✍️نورهان مجدي الغنام
تحدثت مريم عن بداية حبها للغنى وكيف بدأت في هذا المجال، وأنشاءت أغنيتها الجديدة “100 شخصية”، وكانت لمجلة هافن حوار خاص مع المغنية مريم عبدالعزيز ونص الحوار كالأتي:
كلمينا عن مين هي مريم؟
أنا مريم عبد العزيز و اسم الشُهره مريم القزاز
كنت بغنى مع كورال الاطفال من وانا عندى ٨ سنين تقريباً و بعد كده دخلت مجال الدوبلاچ و لحد النهارده أنا ممثلة دوبلاچ و اول شخصيه عملتها فحياتى كان صوت شخصية دورا كل الاطفال عارفاها و بتحبها جداً و عملت voice over لإعلانات كتير
اشتغلت ف مجالات كتير اوى بس اكتر حاجة بحبها و برجعلها هى الغُنا و الدوبلاچ .. عملت ڤيديو كليب من اربع سنين تقريباً كان تريو مكنتش بغنى فيه لوحدى و كان بمناسبة عيد الام و لمسنى جدا لان أنا والدتى متوفيه من زمان و عملت كذا cover لأغانى فنانين تانيين
بقالي سنتين عضوه منتسبه في نقابة المهن الموسيقيه و بغنى في الإمارات من وقت للتانى بعمل حفلات هناك.
جتلك منين فكرة أغنية 100 شخصية؟
الاغنيه سمعتها هى و كذا واحده تانيه بس هى خطفتنى لانها لذيذه و مذكور فيها معظم البلاد العربيه و اللحن و التوزيع شدونى و حسيت ان ده وقتها انها تنزل و تكون اول حاجه اظهر بيها للناس
لما بدأت تصوير الأغنية حسيتي أن ممكن يجي عليها إنتقادات من الجمهور؟
أنا عارفه ان مفيش حاجة الناس مش بتختلف عليه و فى نجوم كبار جدا الناس بتنتقدهم فا طبيعى انى هقابل صعوبات و انتقادات في البدايه لكن أنا حاولت علي قد ما اقدر اقدم حاجه ترضى كل الأذواق و اجتهدت و اشتغلت علي نفسي و أنتجت الكليب لنفسي لانى من زمان عندى الموهبه و شايفه انى استاهل اكون في مكان كويس و اوصل للناس و اقدملهم شئ يحترموه و يحبوه
امتا حسيتي انك عايزة تدخلي في مجال الغناء؟
من اول ما بدأت اكبر شويه و استوعب انى لازم اخد خطوات تخلي صوتى يوصل للناس و ان عندى موهبه اكبر من انى افضل اغني و اشتغل من ورا المايك و اسمى يتكتب لكن الناس مش عارفه شكلى او مين مريم
امتا اول مرة غنيتي فيها؟
اول مره غنيت فيها كانت لوالدتى الله يرحمها كان عندى وقتها سبع سنين تقريباً و كانت اغنية “علي بالي” للفنانه شيرين عبد الوهاب و هى لاحظت ان صوتى حلو و ابتدت تشجعنى و تخلينى اركز ان عندى موهبه و من هنا بدأت اول خطوه انى اغنى مع كورال الاطفال
فكرتي انك تدخلي مجال التمثيل؟
خدت ورشة تمثيل بالفعل من اربع سنين مع دكتور علي بدرخان و جالى عروض تمثيل بس كنت وقتها مهتمه بالغنا اكتر
لو أتعرض عليكي التمثيل تحبي اي الأدوار اللي تشاركي فيها وتكون مع مين؟
احب امثل اي دور يكون في تحدى و مش شبيه لشخصيتى الحقيقيه و ماعنديش حد معين نفسي امثل معاه
لكن لو اتعرض عليا دور مناسب و مساحته كويسه و قصه وورق كويسين هوافق ماعنديش مانع
مين وقف جنبك في نجاحك؟
أهلى من وانا صغيره جدا بيدعمونى و بيشجعونى و شايفين فيا الموهبه من وقت ما كنت طفله و لحد النهارده
في اي أعمال جديده ليكي بتفكري فيها؟
اه بحضر حاجه جديده ان شاء الله بس مش إنتاجي أنا
هتنزل قريب و لون مختلف عن اغنية ١٠٠ شخصيه اتمنى تعجب الناس بس مش هقول تفاصيلها خليها مفاجأه
و مش هوقف ان شاء الله هيكون في دايما اعمال ليا و هكون متواجده ب استمرار لحد ما اوصل للناس و اقدملهم اللي يحبوا يسمعوه و يشوفوه
