إعداد : أميرة سامي
قصة دانيال النبي
1. النبي الحكيم الذي انتقل إلى بابل
كان هناك ولد طيب اسمه دانيال يعيش في مدينة أورشليم.
وفي يوم من الأيام ، جاء ملك قوي اسمه نبوخذنصر وأخذ دانيال مع بعض الأولاد إلى مدينة بعيدة اسمها بابل.
دانيال كان ذكي ومؤدب ، وبيحب ربنا جدا ، ولذلك الملك اختاره يعيش في القصر ويتعلم علوم كتير.
2. دانيال يرفض طعام الملك
الملك كان عايز كل الأولاد ياكلوا أكل خاص من عنده ، لكن دانيال قال : “لأ … الأكل ده مش مناسب لينا.”
وطلب يأكل هو وأصحابه خضار ومية بس.
بعد كام يوم .. لقوا دانيال وأصحابه أصحاء وأقوى من كل الأولاد … فسمحوا لهم يكملوا بنفس الأكل.
3. حلم الملك العجيب
في ليلة ، الملك حلم حلم كبير عن تمثال ضخم
وكان محتار ومش فاهم معناه.
ولا حد عرف يفسره … غير دانيال.
ربنا كشف له التفسير ، وشرح للملك معنى الحلم بكل هدوء.
انبهر الملك وقال : “إله دانيال إله عظيم”
4. أصدقاء دانيال في النار
أصحاب دانيال الثلاثة :
حننيا ، ميشائيل ، وعزريا
رفضوا يسجدوا لتمثال ذهبي عمله الملك.
اتغضب الملك جدًا … ورماهم في أتون نار كبير.
لكن حصلت معجزة .. النار ما حرقتهمش ، وظهر معاهم ملاك يحميهم .. وخرجوا من النار سليــــــــمين.
5. كتابة تظهر على الحائط
ملك اسمه بلشاصر كان بيعمل حفلة كبيرة ، واستخدم أواني الهيكل المقدسة بطريقة غلط.
فجأة ظهرت يد مجهولة وكتبت على الحائط.
اتخض الملك ، ونادى دانيال.
ودانيال قال له : إن الرسالة معناها إن مُلكه هيخلص .. وفعلاً في نفس الليلة انتهى حكمه.
6. دانيال في جبّ الأسود
في زمن ملك اسمه داريوس ، كان دانيال محبوب جدًا.
وده خلى بعض الرجال يغيروا منه.
عملوا خطة شريرة ، وخلو الملك يكتب قانون يمنع حد يصلي لغيره.
لكن دانيال ما خافش … وفضل يصلي لربنا زي كل يوم.
قبضوا عليه ، ورموه في جبّ الأسود.
وفي الصبح … الملك جري خايف يطمن عليه.
ولما فتحوا الجب لقوا دانيال واقف سليم.
لأن ربنا بعت ملاك وقفل بُقوق الأسود.
اتفرح الملك جدًا ، وعمل أمر يمجد فيه إله دانيال.
الخلاصة للأطفال
دانيال كان ولد شجاع ، بيحب ربنا ، وما خافش يقول الحق.
وربنا كان دايمًا بيحميه لأنه كان مخلص وأمين.
