✍️ نورهان مجدي الغنام
ناندا محمد، ممثلة سورية خريجة المعهد العالي للفنون المسرحية، استطاعت أن تترك بصمتها في عدد من الأعمال الدرامية والسينمائية، مقدمةً شخصيات متنوعة كشفت عن موهبتها وقدرتها على الانتقال بين الأدوار المختلفة.
شاركت ناندا في مجموعة من الأعمال الفنية، من بينها مسلسل «بطلوع الروح» و«حق ميت»، إلى جانب عدد من التجارب التي أسهمت في بناء مسيرتها الفنية.
وكان آخر أعمالها مسلسل «بنج كلي»، الذي قدمت خلاله شخصية «نادية»، الممرضة في مستشفى الحياة ومساعدة الدكتورة أمل، في عمل من إخراج نادين خان وتأليف محمد سلمان.
وفي حوار خاص مع مجلة هافن، تحدثت ناندا محمد عن تجربتها في مسلسل «بنج كلي»، وكواليس الشخصية التي قدمتها، إلى جانب مشوارها الفني وأبرز محطاتها وتفاصيل من تجربتها في عالم التمثيل.
وإليكم نص الحوار:
نادية اتظلمت مرتين: مرة باتهام السرقة، ومرة لأنها اتجبرت تتقري فاتحتها على شخص مش مناسب.. إنتِ شايفة نادية كانت ساذجة ولا كانت محتاجة دعاء تشجعها على خطوة قوية؟
نادية مش ساذجة طبعًا، هي فاهمة كويس أوي إيه اللي بيحصل، وعايزة تغير حاجات كتير في حياتها، بس هي زي أشخاص كتير، بتخاف من إنها تاخد قرارات كتيرة في حياتها، وأكيد محدش كان بيساعدها ويشجعها أوي.
ودكتورة دعاء عملت في حياتها فرق كبير جدًا، ومعانا إحنا كستات في حياتنا، بيكون في نماذج سيدات في حياتنا بيساعدونا إننا ناخد الخطوة ونكتشف شجاعتنا أكتر، وده اللي حصل مع نادية، غير إنها برضه ما بذلتش جهد إنها تثبت عكس ذلك، بس عشان هي عارفة إن ربنا هيجيب لها حقها، وده اللي حصل.
لو كنتِ مكان نادية، كنتِ وافقتِ تاخدي خطوة جريئة زي دي وتسجني الشخص اللي مضايقك، ولا موقفك كان هيكون إيه؟
طبعًا أنا لو مكان نادية هعمل كده. آه، هو ممكن يكون فعل مخيف ومش سهل شوية، لو شخص زي مغاوري في المسلسل، يعني كان مدمن، وممكن يعمل أي حاجة.
أنا شخصيًا في الحياة بحاول إن أي حد شايفة إنه مجرم أو بيعمل حاجة غلط، آه طبعًا هسام وهبذل جهدي إنه يتحبس وياخد عقابه.
وأنا عندي الجرأة على كده، لأن اللي يسكت عن حاجة زي دي أو جريمة أو حاجة وحشة، هيشارك فيها من وجهة نظري.
إي أصعب مشهد صورتيه من وجهة نظرك؟
من أصعب المشاهد كانت كذا حاجة، الصراحة مشاهد العمليات كانت صعبة، رغم إن نادية ما كانش عندها أفعال كتير أو أحداث كتير في العمليات، بس كانت مشاهد بتاخد وقت طويل في التصوير.
هو ما كانش صعب كمشهد شعوري، لكن كانت المشاهد صعبة في تنفيذها. والمشاهد اللي كانت صعبة برضه هي اللي كنت ببذل فيها جهد، لما نادية اتهمت بالسرقة لحد ما تاخد براءة، وتتكلم مع رحيم وتقوله إنها في لحظة فكرت إنها تعمل كده.
المشاهد دي كلها ورا بعض كانت حساسة جدًا ومحتاجة تحضير وتركيز جامد جدًا. فالصراحة أستاذة نادين كانت بتوفر لنا في اللوكيشن أكتر حاجة تساعد الممثل على التركيز، وكانت المشاهد الصعبة بتكون دقيقة جدًا مع الناس كلها عشان تدي الممثل كل الحاجات اللي محتاجها عشان يقدم شغله على أكمل وجه.
هل حصل قبل كده إن شخصية مثلتيها أثرت فيكي لدرجة إنك خرجتي من التصوير وأنتِ بتفكري فيها؟
آه، حصلت معايا كذا مرة إني أخلص شغل وأفكر في الشخصية، وفي دور نادية حصلت معايا قبل كده. يعني في ثواني فكرت قد إيه لو أنا كنت مكانها كنت هعمل إيه، وقد إيه صعب الظلم لما تتظلمي للحظات، وقد إيه الإنسان محتاج داعم ليه زي دعاء لما كانت بتعمل مع نادية.
وفعلًا فكرت في حاجات كتير ليها علاقة بالشخصية ولحظات بعد التصوير، وده كانت لحظات جميلة جدًا.
مين أكتر ممثل نفسك تمثله معاه؟
الصراحة في ممثلين كتير نفسي أمثل معاهم، يعني مثلًا بحب جدًا عصام عمر، أحمد مالك، هدى المفتي، هشام ماجد، منى زكي، ناس كتير نفسي أشتغل معاهم، ممثلين كبار وأعمالهم ممتعة جدًا، ودايمًا لما بشوفهم في التلفزيون بيكونوا شاطرين جدًا.
وفي برضه آسر ياسين، ودينا الشربيني، وكندة علوش، ففي ناس كتير أحب أشتغل معاهم.
لو مكنتيش جسّدتي دور نادية، كنتِ تحبي تجسدي أنهي شخصية في «بنج كلي»؟
لا، ما فيش. كنت أحب أمثل دور نادية، حتى لو ما كنتش خدت دور نادية وخدت دور أي حد تاني، كنت هحب نادية برضه، لأن دور نادية بالنسبالي يعني حتة وهو على الورق، أستاذ محمد سلمان عبد الملك كاتبه حلو أوي.
وهي شخصية مثيرة للاهتمام بالنسبالي وبعيدة عني جدًا، فهختار نادية، مش حد تاني.
إيه أكتر الأعمال اللي اتعرضت الفترة دي وشدت انتباهك؟
أكتر حاجة شدت انتباهي بصراحة في رمضان اللي فات كان «عين سحرية»، حبيته جدًا، والمسلسل كله كان تحفة، من الإخراج والتمثيل وكل حاجة، والنص والمزيكا.
وانبسطت جدًا إن السدير مسعود، وهو مخرج سوري، عمل مسلسل بحلاوة «عين سحرية» ومصري جدًا، فكان مسلسل بالنسبالي حلو ومؤثر جدًا.
هل في اي أعمال قادمه؟
آه، إن شاء الله في حاجات كتير قريبة، إن شاء الله تكون لذيذة والناس تحبها، بس لسه كده كله في المطبخ وبيتحضر، وما فيش حاجة لسه رسمية أعلنت عنها.
فإن شاء الله استنوا، في حاجات جديدة هتعجبكوا.
