حوار/نورهان مجدي الغنام
شارك الفنان محمود حجازي في فيلم “في عز الضهر” وجسد شخصية ديفو الذي يتحدث اللغة المغربية، الفيلم من إخراج ماريو مكرم، تأليف كريم سرور، وشارك فيه كلًا من مينا مسعود، شرين رضا، محمود البزاوي، جميلة عوض، بيومي فؤاد، إيمان العاصي.
وكانت لمجلة هافن حوار خاص مع الفنان محمود حجازي ونص الحوار كالاتي:
ازاي حضرت لشخصية ديفو، وازاي قدرت تتقن اللغة المغربية؟
ركزت على الدور بشكل بروفيشنال جدًا وكان متابع معايا أصدقائي من المغرب، لأن الدور كان محتاج اشتغل مع ناس من المغرب، فا أنا كنت قدمت مسرح زمان في 2011 وسافرت المغرب كذا مرة وفزت بجوائز.
فلما جالي الدور بدأت استعين بأصدقاء منهم من ضمنهم كان الممثل مهدي البياض بدأنا نذاكر الدور خطوة خطوة ويسجلي فويس، وبدأنا نتكلم ونعمل زوم ميتنج كتير وبروفات على الدور لحد أما طلع باللغة المغربية الصح.
هل أخد منك وقت طويل إنك تتعلم اللغة المغربية؟
اه طبعا خد مني وقت ومجهود عشان أقدر أطلعها بالشكل ده لأن اللغة والإيقاع مختلف تمامًا عن المصري فكان بالنسبالي انت بتتعلم لغة جديده خالص.
إي رايك في قضية الفيلم وعمليات الاحتيال، وهل أتعرض لموقف زي ده قبل كده؟
طبعًا في مواقف كتير ممكن تحصل للبني أدم، والفيلم بيحتوي على أكشن وإثارة وفيه دراما لذيذة تتحكي وفي الحقيقة انت ممكن يحصلك أكشن كده.
إي شعورك وانت بتقدم شخصية جديده ومختلفة عن أي دور عملته، محستش بخوف وقلقل من الدور؟
أنا دايمًا بحب أني اتحط في تغير لأن هو ده اللي بيحركني لما الموضوع بيكون صعب ومختلف ده اللي بحب اختاره، فا بحب كل فترة أقدم دور مختلف.
كلمنا عن تعاونك مع مينا مسعود وشرين رضا؟
اشتغلت قبل كده مع شرين في “حجر جهنم” ليا مشاهد بيني وبينها هي جميلة ومريحة جدًا وشاطره.
مينا من الشخصيات الجميلة أنا بعتز بصداقتهم أن هم ناس بتشتغل صح ناس عايزين يعملوا حاجة وليا الشرف انه يجمعنا صداقة وبيجمعنا عمل فني واحد.
إي الصعوبات اللي وجهتك في شخصية ديفو؟
كانت في شوية صعوبات في فكرة التصوير، التصوير خد مننا سنتين نصور فيه، وعقبال اما ينزل خد وقت، فا الفيلم إنك ترجع للدور تاني وحماس الدور فا ده بيخليك انه مهما يحصل في حياتك لازم في نفس الوقت تكون في جو الدور والشخصية عشان ميكونش في اختلاف.
إي نوع القضية اللي حابب انك تشارك فيها في اي عمل فني ليك؟
حاجات تكون فيها تسلية يعني أنك تخلي الجمهور ينبسط أو يفكر ده كله قضايا لذيذة، الفكرة كلها أن الفن بينقل واقع شوية مع إضافة لمسات فنية مع مسدج حتى لو المسدج ترفيهية فا بردوا ده رسالة.
لأن الواحد لما يتفرج على التلفزيون يحس بمواقف حصلتله فا يتعلم منها او انه يشوف عالم مختلف في السينما ويتخيل حياة البطل وتشوف معاناته مع الأبطال اللي انت بتحبهم بتعيش معاهم دراما مختلفة فاده يخليك تستمتع.
لو حبيت تقدم حاجة أكشن تحب تقدمها مع مين من الفنانين؟
احب اكون مع كل الممثلين اهم حاجة اننا نكون بنقدم محتوى يحترم عقلية المشاهد، وإن احنا نقدم جديد ونتطور.
إي أكتر عمل فني موجود حاليا واتمنيت تكون جزء منه؟
حبيبت مسلسل “لام شمسية” وكنت حابب دور شاهين جدًا
إي أكتر عمل فني عملته حسيته قريب لشخصية محمود حجازي؟
لا لسة معملتش دور قريب لشخصيتي.
هل في أي أعمال قادمه بتحضر ليها دلوقتي؟
الفترة دى احنا في قلب السيزون فا مفيش حاجة جديده اقدر أعلن عنها
