✍️ يوحنا عزمي
المناقشة الأساسية الثابتة من 7 أكتوبر 2023 لحد النهاردة ويمكن هتفضل لحد ما يحصل وقف إطلاق للنار في غزة ولبنان مناقشة هترجع تاني مع كل مرة دواير الدم تنفجر في وش المنطقة من جديد بين الإحتلال واى طرف عربي .
مناقشة بعنوان هي مصر هتحارب أمتي ، هي مصر خايفة تحارب ولا إيه ؟
اللى بيقولك احارب واخسر إقتصادي وجيشي يتدمر ليه واللى يقول عايزني أبقي زي سوريا والعراق ليه .. أما الفريق اللى مع الحرب في سكربتاته اسوأ .. هما تقريبا لسا شغالين على سكربتات القومية العربية والحقبة الناصرية واللى عرف يعمل تغيير دخل على فكرة الجهاد والعدو المشترك للمسلمين.
الموضوع اكبر وأعمق من كدا .. مصر مش خايفة تحارب ومصر أهل للحرب وكفاءة ومصر لما تدخل حرب مفيش اختيار تاني غير يا تنتصر يا تنتصر .. أما الخوف من مصير غزة ولبنان ولا حتى إيران دا مش موجود في قاموس الجيش المصري ولا حسابات صانع القرار الوطني في مصر ، إنما موجود حسبة تانية لازم تفهمها كويس قوي .. أنه لما عدوك وهنا انا مش قصدي عدوك ف تل ابيب دا مجرد وكيل أعمال للعدو الحقيقي .. لما عدوك في الغرب يبقى محضر الملعب وعايز بقواعد لعبه هو .. هو هيبقي الخصم والحكم يبقا الصح إنك متلعبش .. عشان حتى لو انتصرت برضوا هيبقي إنتصار بمرارة الخسارة.
إزاي الكلام دا بس .. هوضحلك اكتر .. ركز معايا عشان ناس كتيرة بتتجنب الكلام في الموضوع دا والأسهل أقول هندشمل وهنغربل انت لو حبيت تشتبك مع إسرائيل هيبقا قدامك ايه ؟
ما هو يا عمل جوي وصاروخي على مناطق جوا فلسطين المحتلة او عمل بري انطلاقا من الحدود المصرية الفلسطينية اللى هو من الآخر قطاع غزة .
خلينا نتفق أنه عمل جوي وصاروخي على تل أبيب ولا غيره دا مجرد شو ومهما ضربت مينفعش تضرب من غير ما يبقى فيه زحف بري او عندك قوة مقاومة على الأرض شغالة معاك السؤال هنا .. انت واثق لما تدخل كيلو متر واحد في قطاع غزة مين معاك ومين ضدك ؟
لا مؤخذة يعني هو انت فاكر إنك لما تدخل الحرب حماس وحزب الله وسوريا وإيران هيبقوا معاك ؟
دا انت الهدف الحقيقي بتاعهم ، دول ناس يحطوا أيديهم في أيد الشيطان والدجال واللهو الخفي لو موجود ضد مصر.
انت لو دخلت اى منطقة إيران بتسيطر عليها في الشرق الأوسط كل ميلشيات واوباش إيران هيسيبوا الإحتلال والأمريكان وهيضربوا فيك انت .. انسى بقا حواديت أننا كلنا مسلمين وكلنا عرب وافهم أنه المحور الإيراني السوري بيلعب سياسة من الأول ومش عايز غير زعامة المنطقة على حساب القاهرة وبغداد وبيروت وحتى الرياض وأبو ظبي ودبي.
وهي صواريخ الحوثي قبل مسرحية طوفان الأقصى كانت بتضرب فين ما كانت بتضرب في الخليج العربي وهى ميلشيات حماس وحزب الله مش شاركت في مؤامرة جمعة الغضب 28 يناير 2011 وفي مؤامرة فتح السجون وتهريب مساجين حماس وحزب الله من السجون المصرية بعد ما تم القبض على خلية حزب الله في مصر سنة 2008 مكانوش جايين يحاربوا الإحتلال في أرضنا طبعا ولكن الهدف كان اغتيال الرئيس حسني مبارك وعمل سلسلة تفجيرات في سيناء تدمر لك السياحة والمجري المائي لقناة السويس.
فأنت يا عزيزي مالكش حليف ولا صاحب في المعركة دي عشان تدخلها اصلاً .. الشعوب على عيني ورأسي إنما كل الميلشيات دي بنت سكربتات دا جيش كامب ديفيد ، وحياتك اول ما هتدخل ولا تعلن الحرب هيقولوا لك مصر مقسمة مع الإحتلال وداخلين نسلمها مش نحررها.
دا فخ اتنصب قبل كدا لمصر بعد حرب أفغانستان 2001 وحرب العراق 2003 واتطلب من مصر تبعت قوات حفظ سلام ومصر فهمت وقتها اللعبة أنه نبعت فرقة وسط شوية ميلشيات إيرانية ويستفردوا بضابط من عندنا ويحفلوا عليه وياخدوا اللقطة والكلام دا حصل قبل كدا واتعمل له بروفة واتنين.
سنة 2010 ميلشيات حزب الله قبضت على مصري في جنوب لبنان وقالوا لك جاسوس وقتلوه ومثلوا بجثته وعلقوها على عامود نور بعد ما سحلوه حتى الموت في شوارع الجنوب.
سنة 2005 ميلشيات إيران في العراق خطفت السفير المصري إيهاب الشريف وعذبته حتى الموت ورمت جثته في النهر قالوا وقتها أصله كان سفير في إسرائيل قبل ما يبقا سفير مصر في العراق وبالتالي دا تعاون مع الإحتلال ووجب قتله ..
فصباح الخير .. أنت لسه سنة أولى سياسة وبيتضحك عليك بكلام وديباجات وسكربتات القومية العربية والوحدة الإسلامية وأول ما هتدخل هناك مش هتلاقي لا عرب ولا مسلمين كلهم يهود هناك .
المعركة بين صهاينة إيران وصهاينة إسرائيل .. لما الباطل يغلب الباطل يبقا الحق يدخل يخلص إنما السيرك اللى قدامك دا كله باطل دا كرنفال ومهرجان الباطل للجميع.
فالحدوتة عمرها ما كانت خوف .. ولا أصلي خايف من مصير سوريا والعراق ولا أصلي خايف على مشاريعي والإستقرار والكباري والانفاق والعلمين الجديدة والعاصمة الإدارية.
إنما صانع القرار في مصر فاهم كويس أنه كل الأطراف دي هتسيب اللى فى أيديها وهتضرب فيك مع أول فرقة مصرية تدخل الأرض المحتلة.
اقولك حاجة ؟ .. الشعب ولا قسم منه اللى بيقولك دلوقتي حارب مع اول أسبوع إقتصاد حرب هيبدأ يقلب ويقول إحنا مالنا مع اول سلعة وأول شريط دواء هينقص في السوق هيبدأ التبرم ويقولك انا مالى ومال فلسطين.
الدرس اللى الجيل الحالي من العقلاء في مصر فهموه سواء مدنيين او عسكريين أننا قدام رأى عام مُتلقن ومتسرح بكل أسف .. اه دي الحقيقة .. دا مش وعي زائف دا وعي مغتصب ومتلقن .. رأى عام بيطالب بالحاجة وهو مش فاهم هو فعلا محتاجها ولا لأ .. قادر على دفع تمنها ولا لأ .. رأى عام ردد مطالب في يناير 2011 ولما جه وقت أنه يتغير زي ما غير معرفش لا يتغير ولا يدفع فاتورة التغيير وقالك الإخوان ضحكوا عليا ولولا أنه عندك جيش لم وشال من وراك ومرتين مش مرة واحدة مرة في 11 فبراير 2011 ومرة في 30 يونيو 2013 بس انت اللى نسيت .
كنت بتعيط وانت بتشوف الإستثمار الأجنبي في دبي وشكل الشوارع في تركيا وخد يا حسني يا مبارك شوف تجربة ماليزيا لا شوف تجربة تركيا لا تعالي نقلد فنزويلا ومع أول صفقة استثمارية اتسرحت وقلت البلد بتتباع ومع أول جولة نضافة للشوارع قلت يعني هي الناس هتاكل كباري ومع أول ناطحة سحاب في العاصمة الإدارية الجديدة قلت دى للاغنياء مش الفقراء ولحد دلوقتي محدش فاهم الفقراء هيسكنوا حي الأعمال في العاصمة الإدارية ليه ؟
بس أهو رأى عام متسرح وراء لجان رخيصة ودتك يمين في 2011 وبعد كدا ودتك شمال بعد 2013 وللأسف الزبون لقطة وكروديا ومضمون من قبل يناير 2011 في الحكاية دي.
فالقرار الوطني وقرار الحرب والسلام والقرار الحربي وشؤون الجيش وقرار الحرب مش بيتاخد ولا عمره ما هيتاخد من السوشيال ميديا ولا بضغط من رجل الشارع والرأي العام تسرح لجنة تسرح مئة الف لجنة القرار الوطني والاقتصادي والعسكري نابع من مفردات الأمن القومي المصري اللى بيحددها أجهزة شايفة كل حاجة في الجيش والمخابرات العامة ومؤسسة الرئاسة والأمن الوطني.
وعلى فكرة .. الغرب كلف إيران بنفس اللعبة دي قبل كدا مع العراق .. والعراق انتصرت في الحرب العراقية الإيرانية او الحرب الخليجية الأولي اللى كانت بالمناسبة أطول حرب في القرن العشرين .. لا كانت الحرب العالمية الأولي ولا التانية ولكن حرب إيران والعراق 8 سنين من الهبد واستنزاف دولة مسلمة لدولة عربية والنتيجة العراق خرج من الحرب منتصر بشهادة إيران
اللى مرشدها قال لما وقع إتفاق وقف إطلاق النار أنه يتجرع كأس العلقم يعني كأس من السم ..
العراق خرج من الحرب مديون لكل دول الخليج ومدمر رغم أنه انتصر ما هو متفتكرش أنه حضرتك هتروح تعمل غارات في تل ابيب وحيفا ومفيش ولا صاروخ ولا درون مش هيفلت وينزل يغربلك العمرانية ولا الطالبية ولا غيرها ما هو مفيش دولة بتخرج من الحرب وهى كل شوارعها بدون إصابة او عدوان بنسبة 100 % إلا لو ناويين نعمل مصر only me ولا hidden لحد ما الحرب تخلص .
واللى إيران بتعمله دلوقتي وجر رجل مصر في مقلب حرامية مع إسرائيل عملته بطولها مع العراق في ثمانينات القرن العشرين وبعد كدا فضلت تجر شكل الخليج العربي سنين وسنين ..
يعني شوف وسط كل المشاكل الوجودية اللى إيران بتمر بها دلوقتي ولكن يطلع كمال خرازي رئيس المجلس الإستراتيجي للعلاقات الخارجية الإيرانية ومستشار مرشد إيران يقول لك البحرين ليست عربية بل جزء من إيران وان جزر الإماراتية الثلاث (طنب الكبرى وطنب الصغرى وأبو موسى) اللى بتحتلهم إيران مسألة منتهية لا تقبل النقاش ..
يعني حتى في وسط ما الإحتلال والأمريكان بيغربلوا طهران واصفهان بالصواريخ والدرونز .. ووسط ما كل قواعد إيران في سوريا ولبنان والعراق واليمن وفلسطين خمس دول عربية بتتضرب وبيتم تصفية المشروع الإقليمي الإيراني لسا إيران عندها ولاء للهدف الوظيفي اللى اتعملت عشانه ومكلفة بفتح جبهة الخليج العربي مهما كان الثمن.
التصريحات دي اتقالت في الوقت اللى وزير الخارجية الإيرانية عباس عراقجي بيلف الدول العربية بيتوسل التضامن العربي وعدم التعاون مع الإحتلال وامريكا في العدوان الإسرائيلي المرتقب على إيران.
انت بتتضرب في خمس دول عربية وسادسهم إيران نفسها بس بتهدد باجتياح الإمارات والبحرين وبين السطور رسالة تهديد للسعودية وقطر والكويت .. فالناس دي يوم ما هتحط رقبتك وسطيهم هيعملوا ما هو اسوأ مما عمله الصهاينة .. هما حلمهم أنهم يبقوا سادة الشرق الأوسط وشايفين العرب سواء الخليج او مصر هما المنافس الحقيقي وكل اللى بيعملوه في فلسطين هو توظيف قضية العرب المركزية لضرب الدول العربية نفسها.
إيران احتلت أربع دول عربية هي سوريا والعراق واليمن ولبنان تحت مسمى المقاومة وتحرير القدس ومحاربة إسرائيل ..
وخد بالك .. الراجل دا مش بسيط .. كمال خرازي سفير إيران في الأمم المتحدة وبعد كدا بقا وزير خارجية في زمن الإصلاحي محمد خاتمي .. الإصلاحي داه دلوقتي مستشار للمرشد وبيقول الكلام دا عشان تفهم أنه وقت الجد مفيش فرق بين التيار الإصلاحي والتيار المحافظ في إيران.
والتقارير كلها بتقول ان إيران حاليا مش هتنسي غدر الرئيس السوري بشار الأسد اللى رفض تحويل النظام السوري لجبهة إسناد فنكتة توحيد الساحات وان النظام السوري طرد عناصر حزب الله من محافظة حمص ومن القواعد العسكرية السورية في دمشق ودير الزور واللاذقية ودمشق وريف دمشق ..
وان النظام الإيراني هو اللى بيدور على صفقة مع الغرب ولا إسرائيل عشان يبيع بشار الأسد ويقبض التمن مش عايزين يتخلصوا منه بنفسهم ولكن عايزين مكاسب من أمريكا مقابل الإرشاد عنه .. زي ما ارشدوا عن يحيي السنوار وإسماعيل هنيه اللى اتسلم في عاصمتهم وزي ما ارشدوا عن رئيسهم إبراهيم رئيسي وحسن نصر الله وهاشم صفي الدين وزي ما سلموا الصف الأول والتاني من حزب الله وحماس والجماعة الإسلامية اللبنانية كل دي صفقات الخيانة مقابل نجاة إيران حتى الآن من مصير نظام صدام حسين.
وإيران مصلحتها ان النظام السوري يسقط وتملا برجالتها وعناصرها هذا الفراغ بإعلان دولة الساحل السوري دولة شيعة سوريا جمهورية اللاذقية بطول الطريق الدولي من دمشق للساحل وطهران بقالها 15 سنة من اول يوم في الحرب السورية بتوطن الشيعة في دمشق لحد ما قبلت هويتها من مدينة عصرية لمدينة شيعية كأنك بتزور النجف في العراق مش عاصمة الشام.
كل من له تار معاك اول ما هتدخل المعركة دي هيبعت اللى فيه النصيب عشان يخلص عليك ويخلص منك والاشقاء قبل الأعداء ناس كتيرة جدا لا يمكن ان تتصور نفوسها في مصلحتها ان مصر ترجع لحدود ما قبل 30 يونيو 2013 بلا جيش قوي ولا قرار وطني سياسي واقتصادي وعسكري مستقل وترجع تاني لسنوات شلة التوريث تسمع توصيات الاشقاء العرب وانت ساكت.
فشوف يا ابني شغلك ومذاكرتك وادعم ثورة البناء والتنمية والتعمير والتحديث ادعم الثورة الصناعية المصرية اللى شغالة بدل شغل المراهقين وسكربتات عفا عليها الزمن.
