كتبت : نور أشرف عبد العزيز
تشارك الفنانه القديره سلوي عثمان في رمضان 2025 من خلال تجسيد دور في مسلسل “حكيم باشا ” ، المسلسل بطولة مصطفى شعبان، سهر الصايغ، دينا فؤاد، رياض الخولي، سلوى خطاب، منذر رياحنة، محمد نجاتى، يارا قاسم، ميدو عادل، يارا قاسم، سلوى عثمان، أحمد فؤاد سليم، أحمد صيام، فتوح أحمد، هاجر الشرنوبي، هايدى رفعت والعمل من تأليف محمد الشواف وإخراج أحمد خالد أمين وإنتاج شركة سينرجي و يجسد مصطفي شعبان من خلاله شخصية صعيدية للمرة الأولى .
تفاصيل مشاركة سلوي عثمان في مسلسل ” حكيم باشا”.
اسم الشخصيه اللي بتجسديها ؟ و ما سبب مشاركتك في مسلسل “حكيم باشا”؟
مش هعرف أقول إسم الشخصيه بس أنا طالعه مرات عم مصطفى شعبان اللي هو احمد صيام، وطبعاً اللي شدني للمسلسل أول حاجه أن بشتغل مع مصطفي شعبان و أحمد خالد أمين و استاذ عمرو الدرديري المنشط العام علي المسلسل و سينرجي طبعا بعتبرها بيتي مش أول مره أشتغل معاها ، الدور كان حلو و المسلسل حلو أوي هيعجب الناس أن شاء الله و مصطفي شعبان عامل دور جميل و سهر الصايغ و سلوي خطاب و إياد الخولي و طبعا فتوح أحمد في مجموعه حقيقه كبيره من النجوم و المسلسل مكتوب بشكل حلو .
حضرتك من الفنانين الكبار و اشتغلتي مع أجيال كتير ، ما الفرق بين جيلك و الجيل الجديد؟
الجيل الجديد بيجتهد و بيحاول يثبت وجوده ولازم حتي و هو بيحاول ينتشر لازم يختار الأدوار الصح و لازم يكون في تواجد لنفسه و فكره ،فـ نصيحه أن حتي لو ربنا كرمهم و وصلوا و بقو نجوم ميبقاش عندهم أي نوع من الغرور.
مين من الفنانين الشباب لفت انتباه حضرتك مؤخراً و حاسه أن عنده مستقبل كبير؟
مش فاكره اسمو بالكامل بس هو معانا في مسلسل “سيد الناس” عامل دور أدهم “الممثل يوسف رأفت” و أشترك في مسلسلات قبل كده ، ممثل جميل جدا و هيبقي ليه مستقبل عظيم بأذن الله و بردو الممثل صاحب شخصية أسر “الفنان مصطفى عماد” الاتنين واعين و هيعملو حاجات جميله بعد كده.
طبعا الدراما المصريه اتغيرت في السنوات الأخيرة هل شايفه التغير ده للأفضل و هل في تحديات بتواجهك كـ فنانه؟
اكيد طبعا الدراما دايما بتبقي جايبه من الحياه الحقيقيه و حالياً في تنوع في تقديم المسلسلات ،كل حد بيبقي ليه فكرته اللي بيتكلم عنها من خلال المجتمع المصري ،مثلا حكيم باشا مختلف عن سيد الناس ،و مسلسل أسر ياسين و مي عز الدين بيقولو أن في فكره جديده مقدمها ، فـ كل شخص بيقدم فكره مختلفه عن غيره و المُتفرج هو المستفيد في الاخر بيقدر يختار ما بين كذه حاجه ،و لما بيشوف مسلسل في رمضان أو اتنين بيجي بعدين يكمل بقيت المسلسلات لما رمضان بيخلص.
ازاي بتستعدي لأي دور ؟و هل بعد المشوار الفني الطويل بتحسي برهبه قدام الكاميرا؟
طبعا الممثل بيحس برهبه اول لما بيعمل الدور بتبقي عايزه تملُكي الشخصيه و تحسيها و ده بيساعدك تأديها بشكل جيد ، فـ لازم في أول مشهد الممثل بيحاول يتأكد من أنه ملك الشخصيه اللي بيمثلها.
رد حضرتك علي الجمهور اللي شايف أنك بشكل كبير بتمثلي الأدوار اللي فيها احساس أو بُكي اكتر ، هل شايفه أن المخرجين حصروكي في الأدوار دي؟
بنسبه كبيره اه ، من زمان كمان المخرجين لما بيشوفو شخص نجح في أداء دور معين دايما بيبقو بيحصرو في الأدوار دي، بس انا عملت في حكيم باشا حاجه مختلفه عن سيد الناس و كنت عامله السنه اللي قبل الفاتت في مسلسل “ستهم” دور شرير و ده مختلف خالص عن الأدوار اللي فيها احساس أو عياط ،الناس لما تتفرج علي حكيم باشا هتلاقي أن انا عملت حاجه مختلفه السنه دي.
