يوحنا عزمي
الجهود الصهيونية شغالة عبر قطر عشان يتم تلبيس مصر اى حاجة تتعلق بمأساة غزة ، إتحاد علماء المسلمين أصدر بيان يدعو للجهاد في غزة .. زى ما دول عربية وإسلامية قبل كدا أعلنت الجهاد في أفغانستان ومن ساعتها العالم يعاني من الجماعات الإرهابية اللى خرجت من وعاء الأفغان العرب.
بس سيبنا من التجربة الأفغانية ، إتحاد علماء المسلمين منظمة قطرية في لندن عضويتها حصرية على غلمان التنظيم الدولي للإخوان .. قطر كانت تريد جناح لها في التنظيم الدولي للإخوان هكذا تأسس الإتحاد العالمي لعلماء المسلمين او المعروف اختصاراً بـ إتحاد علماء المسلمين عام 2004 في لندن ، عاصمة التنظيم الدولي للإخوان.
إتحاد علماء المسلمين او الإتحاد العالمي لعلماء المسلمين أصدر فتوي بالجهاد في قطاع غزة وفتح المعابر وقال إنه على كل مسلم إنه يشارك في الجهاد من أهل فلسطين ومن دول الجوار قال مصر والأردن ولبنان .. طيب يا فضيلة الإمام وسوريا ؟
سوريا اللى أعضاء إتحاد علماء المسلمين رقصوا بلدي وافرنجي لما ابنهم أبو محمد الجولاني دخل دمشق أهلها مش مسلمين فمالهمش جهاد ؟ ولا جاهدوا ضد بشار الأسد واترفع عنهم التكليف؟ التخريجة الشرعية اللى في دماغكم الصهيونية إيه يا مشايخ الناتو والصهاينة ؟
الفتوي بتقول أنه الجهاد فرض على الحكومات دي مش الأفراد بس ، ومن ضمن بنود الجهاد اللى الإتحاد بيطالبنا به هو غلق قناة السويس ومضيق باب المندب ومضيق هرمز أمام اى إمدادات رايحة لإسرائيل ، والدول اللى بتصدر غاز ونفط لإسرائيل لازم تبطل تعمل كدا.
طبعا حشر قناة السويس جنب باب المندب مش عفوي ، كلنا عارفين بنك أهداف العدو بخصوص قناة السويس ، وانه العدو ودول إقليمية عدوة برضو نفسها تشوف قناة السويس خربانة زي ما صواريخ الحوثي خربت باب المندب.
المسخرة ان قطر هي اللى بتصدر الغاز والنفط لإسرائيل ، بس إحنا اتعلمنا من فضيحة التمويل القطري للاحتلال الإسرائيلي أنهم بيحرضوا على حاجات هما نفسهم بيشاركوا فيها بس معتمدين أنه الناس مش عارفة واللجان الإلكترونية شغالة غسيل سمعة.
المهم هل تعرف ان الرباعي العربي الذى تشكل ما بين عامي 2017 و2021 من مصر والسعودية والإمارات والبحرين قد وضع هذا الإتحاد على قوائم الإرهاب في تلك الفترة ؟
لما تشوف قائمة مؤسسين الإتحاد دا ، واللى أغلبهم لسا شغال في الإتحاد وقطر توفر له إقامة سبع نجوم في لندن هتفهم أنك قدام إتحاد إرهابي مش إتحاد ديني ، أولا المؤسس هو الراحل يوسف القرضاوي اول رئيس للاتحاد ، مفتي قطر ، من أصول مصرية وهو رجل الدين اللى افتى بجواز تدخل الغرب لنصرة ما اسماه الثورة في سوريا وليبيا.. من ساعتها أطلق عليه لقب مفتي الناتو ، وبعدها اصبح دا لقب حصري على رئيس الإتحاد العالمي لعلماء المسلمين.
ما هي لندن عاصمة بريطانيا تقع في حلف الناتو مغلطناش اهو.
من مصر عندك الكاتب فهمي هويدي والمحامي محمد سليم العوا الاتنين إخوان ، وصلاح سلطان عضو تنظيم الإخوان اللى إبنه يبقا محمد سلطان اللى معاه الجنسية الأمريكية واتمسك لفترة بسبب مشاركته في العمليات الإرهابية في مصر بعد ثورة 30 يونيو 2013 .. صفوت حجازي شارك في تأسيس الإتحاد سنة 2004 وكان رايح جاى على لندن لحد ما اتقفش في مصر سنة 2013.
للى ميعرفوش صفوت حجازي عضو الجماعة الإسلامية المصرية لسا مع القايمة المصرية عندك جاسر عودة قيادي إخواني في كندا.
من تونس عندك راشد الغنوشى شخصياً ، مرشد إخوان تونس ومهندس الإتصال بين عدد من الجماعات الإسلامية في شمال افريقيا والشام وإدارة باراك أوباما .. وحسن عابدين اخو هوما عابدين مستشارية هيلاري كلنتون اللى كانت ناوية تعيينها وزيرة للخارجية الأمريكية لو بقت رئيسة سنة 2017 قبل ما ترامب يسحقها .. هوما عابدين كانت ضابط الإتصال بين التنظيم الدولي للإخوان وإدارة باراك أوباما.
من المؤسسين رجل الدين السعودي المتشدد سلمان عودة اللى المملكة نفسها فهمت شره وانه بيتعاون مع الدوحة ضد المملكة وقامت باعتقاله سنة 2017.
من ليبيا عندك كوكبة من إرهابيين الثورة الليبية ، على الصلابي عضو في تنظيم الإخوان والجماعة الإسلامية المقاتلة ، ونيس المبارك إسلامي ليبي .
من العراق محسن عبد الحميد رئيس سابق لـ الحزب الإسلامي الذراع الحزبي لإخوان العراق وكان عضو ورئيس مجلس الحكم الانتقالي اللى شكله الحاكم العسكري للعراق لمعاونته في قمع الشعب العراقي.
باقى أعضاء الأمانة العامة ونواب الرئيس والمؤسسين والقيادات كلها قيادات اخوانية من البوسنة واندونيسيا وماليزيا وكوسوفا ولبنان وغيرهم.
هؤلاء هم صناع وقادة التنظيم الإخواني القطري اللى بيطالبك وبيدعو للجهاد في قطاع غزة .. حاليا يرأس الإتحاد عالم دين عراقي كردي من منتجات الإحتلال الأمريكي والإيراني للعراق إسمه على محيي الدين القره داغى .. معاه الجنسية القطرية ، الإسم الغريب دا نسبة لمنطقة قره داغ في محافظة السليمانية في العراق.
الأستاذ محمد حسنين هيكل (1923 – 2016) له كام مصطلح في كتاب “الزمن الأمريكي : من نيويورك إلى كابول”.. منهم “الجهاد الأمريكي”، و”أمريكا تؤذن للجهاد الإسلامي في أفغانستان”.
مصطلحات صالحة للاستخدام اليوم ، فـ مفتي حلف الناتو يؤذن للجهاد الأمريكي في قطاع غزة والهدف مصر .. يعني عايز تفهمني انه الاشكال دي، اللى وراهم قطر ممول الإحتلال الإسرائيلي هتحرك جناحها الاسلاموي عشان تنصر غزة ؟
دا نفير عام من التنظيم الدولي عشان منتخب إرهاب العالم يلاقي اى فرصة يتسلل لمصر بدعوى الجهاد في غزة ، او من غزة لسيناء بدعوى انهم يا قلبي بيتهجروا.
