✍️شهد شاهين
محمود حمدان مؤلف مصري مميز تخرج من المعهد العالى للفنون المسرحية، وحقق نجاح كبير خلال مشواره في التأليف وحصل على عدة جوائز مثل جائزة أفضل ممثل في مهرجان أفلام المبدعين العرب عام 2009 استطاع أن يضع بصمته على العديد من الأعمال التي عرفت النجاح مثل مسلسل عوالم خفية وفيلم الديزل وغيرهم من الأعمال الناجحة ويعرض له حالياً مسلسل حدوته منسية وحقق المسلسل نجاح جماهيري وفني كبير وتفاعل معه الجمهور وتصدر مؤشرات البحث فور عرض أولى حلقاته.
كيف جاءت لك فكرة مسلسل “حدوته منسية”؟
فكرة حدوته منسية كانت عندي من سنتين وكنت بطورها طول الوقت كان شاغلني جدا فكرة ماذا لو ست جت تشتغل عند ناس وكان صاحب البيت عنده ولاد صغيرين وقرر إن هو يتجوزها والراجل في وقت ما خايف على ولاده فبيقرر إن هو يكتب الحاجة بإسم الست شافها ست كويسة بالنسبة له وهي مش امهم بس بتتعامل معاهم على إنها امهم وقررت إن انا اتكلم في قضايا الميراث ولكن بشكل مختلف التيمة نفسها تيمة ممكن تكون اتعملت كتير بس انا بتناولها بشكل جديد وبشكل متعملش قبل كدة ودة كان مهم بالنسبالي عشان مكنش بكرر نفسي أو بستهلك أو معنديش جديد عايز اقوله
هل أثناء كتابتك للنص تتخيل من يقوم بالشخصيات؟
لما بكتب الشخصيات مبتخيلش النجوم يعني احيانا ممكن شخصية احسها شبه نجم ما وبس وقت الترشيحات بقول الشخصية دي شايفها فلان أو فلان إن خيالي يحسهم يعني وبنتناقش انا والمخرج لحد مابنوصل لشركة الإنتاج ولحد مانوصل في الآخر للنجم اللي يليق بالشخصية
كيف لمست ردود الأفعال على مسلسل “حدوته منسية”؟
ردود الأفعال على حدوته منسية الحمد لله زي مانا كنت متوقعها انا كنت متوقع نجاح المسلسل في حاجات بتتحس كدة لما انا ببقى بجتهد على عمل ببقى حابب وعندي حاجات عايز اقولها وعندي قضايا وعندي شخصيات مختلفة وبطرح حاجات مختلفة بيبقى كدة يقين إن شاء الله العمل هيلاقي نجاح فالحمد لله دة اللي حصل وردود الأفعال مبسوط بيها جدا
تخوض السباق الرمضاني بمسلسل “حق عرب” حدثنا عن تجربة التعاون مع النجم أحمد العوضي؟
أنا في رمضان عندي مسلسلين حق عرب ومسلسل بمية راجل سعيد جدا بالتعاون مع النجم أحمد العوضي ممثل مهم جدا وعنده كتير جدا وهو الحقيقة يعني عنده شغف طول الوقت والنجاح
وإن عايز يقدم شئ جيد فدة محمسني للشغل معاه وانا حابب الشغل معاه جدًا والتجربة وأنا مستمتع بالتجربة مع العوضي جدًا وأتمنى إن هي تتكرر اكتر من مرة إن أنا الحقيقة شامم ريحة نجاح مع أحمد العوضي فربنا يارب يكتبهالنا إن شاء الله ويبقى العمل حق عرب مفاجأة للناس.
إما بالنسبة لسمية الخشاب سمية بتجتهد عايزة تظهر بشكل جديد عايزة الناس تشوفها في شكل جديد وانا نفسي يكون بمية راجل بداية رجوع لسمية الخشاب تاني لجمهورها وبشكل أفضل ويارب يلاقي نجاح زي مانا كنت متخيل وانا بكتب العمل واجتهدت جدا في المسلسلين إن انا احاول اعمل اقصى ما عندي إن انا اطلع عمل درامي محترم في العملين فربنا يكرم يارب.
