قررنا نختار أغنية “ياعراف” عشان حسينا إنها شئ مختلف عن كل الموجود في الساحة
الجمهور بيحب يدور على المختلف عشان كده انجذب لـ “ياعراف”
أنا بحب ألحاني كلها وبتبقى نابعة من جوايا وبعتبرهم زي أولادي الصغيرين
سبب بعدي عن الغنا إن في وقت جه عليا كانت الألحان هي الي متاحة ليا فقط
الديو مع فضل شاكر هيفرحني جدًا لإني بحب صوته بس أعتقد إن المعادلة الفنية بينا مش هتكون حلوة
هقدم تراك قريب وبوعد الجمهور إنه هيكون تراك مختلف على الساحة قريب
فنان شامل بكل ما تحمله الكلمة من معنى، يصعب على كلمات الحوار حتى أن تصف مهاراته وإبداعه بشكل كافي ووافي فهو لم يصل إلى مكانته الحالية بسهولة بل مر منذ صغره بمحطات يطلق عليها البعض “محطات صانعة للنجوم”
فـ هو مطرب وملحن ومؤلف أي على إدراك تام ووعي كافٍ بالفن الأصيل ذو المقاييس الصحيحة، كما إنه عالي الإحساس في غناءه، مبدع ومبتكر في ألحانه، دقيق وذكي في اختيار كلماته، لاسيما أننا نردد ألحانه من حين لآخر دون أن ندري أنه أحد الأعمدة الرئيسية لـ الأغنية، أما عن أغانيه فهي دافية مثل صوته الدافي والعذب فـ نجمنا اليوم هو «أحمد زعيم»
أحمد زعيم
وكان لمجلة هافن حوار خاص من نوعه مع أحمد زعيم ليفتح لنا قلبه ويحدثنا عن كواليس الأغنية وعن أمور تخص مشواره الفني وإليكم نص الحوار :-
-تم إطلاق المؤتمر الصحفي لـ أغنية “ياعراف” منذ سنتين تقريبًا، لماذا تم تأجيل الأغنية لكل هذة الفترة؟
_سبب التأجيل إننا كنا عايزين نوصل لأحلى صورة في الفيديو كليب وكمان كنا حابين نوصل لـ أفضل توقيت عشان الأغنية تنزل فيه وتلاقي صدى، ده غير إن الأغنية كان فيها 3 مطربين
فكل واحد فيهم وراه فريق عمل كبير بجانب شركتين الإنتاج الي أشرفوا على الأغنية ونفذوها، فـ كل واحد من دول كان لازم يعمل دوره بشكل متقن جدًا جدًا وياخد وقته والحمد الله بنسبة كبيرة بعد كل الوقت ده كل حاجة نسبيًا كانت مظبوطة ومرضُية سواء في الصوت أو الكليب.
-لماذا اخترت يا عراف لتكون هي محطة عودتك للغناء بعد فترة غياب طويلة ؟
_الحقيقة إن الأغنية مكتنش الاختيار الوحيد للعودة، ولكن لما عملنا الأغنية من سنتين حسينا إنها شئ مختلف عن كل الموجود في الساحة خاصةً إن في الوقت ده كان اتجاهات الجمهور مايلة ناحية المقسوم والمهرجانات، ففكرنا إن أغنية زي “ياعراف” بالاستايل ده والمزيكا هتروح في حتة حلوة بعيد تمامًا عن الموجود في السوق فحبينا ناخد الخطوة وحققناها.
هل تخوفت من فكرة استقبال الجمهور لدويتو يتكون من 3 أصوات من طبقات مختلفة ؟
_لا بالعكس، الجمهور بيحب يدور على حاجة مختلفة وإن إحنا نعمل تريو فيه 3 أصوات زي صوت أحمد سعد وهو الصوت القوي وصوت نوردو وهو الصوت العريض جدًا وصوتي معاهم كان بين التلاته كيميا وتناغم حلو جدًا والمختلف كمان إن كان فيه تصاعد من بداية الغنوه لآخرها وكل الناس تقبلت ده والحمد الله شايفينه حاجة حلوة.
-هل أخذ مجال الألحان الفنان أحمد زعيم من مجال الغناء أم لم يكن هو السبب الرئيسي؟
_الحقيقة إن في وقت جه عليا كانت الألحان هي الي متاحة ليا فقط، وفي ساعات الإنسان بيكون قدامه طريقين يا بيعارض القسمة والنصيب والقدر يا بيكمل ويسيبها على الله وأنا اختارت الطريق التاني إني أكمل وأكون متواجد حتى لو على طريق الألحان وبالمناسبة الألحان شئ مش جديد عليا ومستحدثتوش بل هي في دمي من زمان وعندي ملكة التحلين وبحبها فـ لما ركزت في الألحان الناس بدأت تنساني وتقول ده زعيم بقى ملحن وبقى نجاحي في الألحان يفوق نجاحي في الغنا فعلًا، والي ساعدني في ده إني اشتغلت الألحان مع اسامي كبيرة من المطربين، بس أنا خلاص مؤمن بدل ركزت في حاجة وهتديها حقها هتنجح وأنا قررت أركز في الغنا ومتوقع نجاحات كتيرة فيه إن شاء الله.
–ما هي الأغنية الذي لحنتها وتمنيت أن تكون بصوتك؟
_أغاني كتير، معظم الألحان الي عملتها كنت أتمنى أغنيها بصوتي بس مش كل حاجة هعملها أغنيها أكيد، بس أنا فعلًا بحب ألحاني كلها وبتبقى نابعة من جوايا وبعتبرهم زي أولادي الصغيرين وليهم معزة خاصة عندي ولكن أكتر اتنين أثروا فيا كانت أغنية كل الأعذار كدابة لـ هيثم شاكر
ولما تفتكريني لـ أمير دندن كانو قريبين من قلبي.
–بعد تشبيهه صوتك بالفنان فضل شاكر، هل توافق إن عرض عليك تقديم دويتو معه أم ستخاف من المجازفة؟
_بالعكس أنا أتشرف بـ ده، أنا عمري ما زعلت من تشبيهي بصوت الفنان فضل شاكر ده مدرسة وفنان كبير وعلم من علامات المزيكا، لكن أنا بقول إن الناس لما تسمعني تقول ده صوت أحمد زعيم مش شبيهه فضل شاكر وده حسيته من أغنية “ياعراف” الحمد الله والناس بقت تسأل على اسمي وعرفتني ومبسوط إني بعدت عن منطقة التشبيه وبقى ليا علامة عند الناس، فموضوع الديو هيفرحني جدًا لإني بحب صوته لكن أعتقد إن المعادلة الفنية مش هتكون حلوة، لإن إحنا أما بنعمل ميكس لازم يكونوا الطرفين مختلفين ولايقين على بعض، لكن اتنين شبهه بعض مش كتير بينجحوا في ده.
-حققت نجاح كبير أثناء غناء تتر مسلسل رأس الغول، هل ستكرر التجربة مرة آخرى ؟
_أتمنى إني أكرر ده، لإن تترات المسلسلات بتبقى حلوة جدًا وخاصةً لما يكون أبطال المسلسل والمسلسل تُقال فمعنديش مانع خالص بل أتمنى إني أكررها.
–ماذا عن أعمالك الفنية القادمة؟
_على مستوى الألحان إليسا وهيثم شاكر ومحمد حماقي وراغب علامة ومجموعة حلوة من الفنانين ولكن على مستوى الغنا أنا بحضر تراك وخلصت اللحن بتاعه وهو من توزيع توما وأوعد الجمهور أنه هيكون تراك مختلف على الساحة إن شاء الله.
