حوار/ منار عبد الناصر
•صبا مبارك من الحاجات اللي حمستني لمسلسل بين السطور
•دور أحمد فهمي جديد عليه واستفزه انه يطلع قدرات تمثيلية جديدة
•أرى تنوع في المنافسة الرمضانية لهذا العام وانتظر مسلسل الحشاشين والكبير
•رسالة مسلسل بين السطور هى النسبية بمعنى لا يوجد خير مطلق ولا شر مطلق
مخرج متميز جدًا في مجاله، له نظرة اخراجية مختلفة، ومذاق شخصي مميز في رؤيته وتنفيذه للأعمال الدرامية، بدأ طريقه في مجال الاخراج منذ خمس سنوات فقط ليستطيع أن يقوم بقيادة أعمال درامية ناجحة أحببناها ولاقت نجاحا كبيرا مثل مسلسل الآنسة فرح، حكاية كاملة من مسلسل حدث بالفعل، وأخيرًا وليس آخرًا المسلسل الذي لاقى تفاعلًا جماهيريًا كبيرا في مصر والوطن العربي وهو مسلسل بين السطور الذي يعرض حاليا، وتواصلت مجلة هاڤن مع المخرج الكبير وائل فرج ليدور حوار متميز حول كواليس العمل والمفاجآت التي ستكشفها الحلقات المُقبلة.
بدايةً.. كيف كانت رؤيتك لمسلسل بين السطور ؟
رؤيتي كانت ان أكتر حاجة شدتني للمسلسل انه هو فعلا كله بين السطور، والحاجات مبتتقالش بشكل مباشر وكانت الرؤية ان طول الوقت نستغل فكرة ان الحاجات تكون مش صريحة ومعتمدة على طريقة شرح سينمائية والكلام مش مباشر والموضوع كله معتمد على تمثيل وعلى طريقة سرد غير معتادة للحدوتة طريقة تركيب السيناريو وطريقة الاخراج وطريقة التمثيل، طول الوقت الحوار مش هو الرئيسي الحوار في الغالب بيبقى عكس المشهد
فـ دي أكتر حاجة استفزتني في المشروع وكانت عجباني، وطريقة حكي الأزمنة المُتداخلة بشكل مُعقد جدا هى دي كانت رؤية المشروع، القصة دي ممكن تتحكي بشكل تاني خالص لو كانت قصة اجتماعية بس الشكل اللي حكينا بيه القصة هو ده اللي كان فيه تحدي يعني الصعوبات اللي كانت في الموضوع هى دي الحاجة الحلوة اللي الواحد كان بيجري وراها.. ازاي نعمل المسلسل بطريقة جديدة وغير مباشرة ومحتاجة تركيز من اللي بيتفرج.
وماذا عن التعاون مع صبا مبارك وأحمد فهمي ؟
التعاون كان كويس طبعا، أنا بحب صبا جدًا وهى ماكنتش اختياري أنا جيت لقيتها مشروع وكنت مبسوط جدا يمكن من الحاجات اللي حمستني للمشروع انه بطولة صبا مبارك؛ لأني بحب صبا جدًا من قبل ما كنت أعرفها على المستوى الشخصي.. ممثلة قوية جدًا جدًا، وأحمد فهمي كان اختياري طبعا وأنا كنت حابب ان أحمد يطلع بالشكل ده، أنا مؤمن بيه جدًا كـ ممثل وممثل قوي ويمكن محصلش قبل كده انه يبقى في دور يستفزه انه يطلع قدرات تمثيلية جديدة ويمكن محصلهوش ده قبل كده وكان محصور في نوعية من الأدوار الخفيفة وحتى الأدوار التقيلة اللي عملها كان بيطلع بدور الراجل الخاين أو الراجل العصبي، فـ فكرة ان فهمي أقدر اخد منه جانب جديد خالص من قدراته التمثيلية وانه يبقى بيمثل بعنيه أكتر وهادي طول الوقت وهدوئه ده فيه حرارة واستفزاز وكل حاجة بتتعمل بشكل مختلف على فهمي فـ دي برضو كانت حاجة عجباني في رؤيتي لفهمي في تسكينه في الدور.
كيف ترى ردود الأفعال ؟
الحمدلله مبسوط جدًا بردود الأفعال مبسوط جدا بتوقيت النزول مبسوط جدا ان المسلسل بيتعرض على مجموعة MBC والمتحدة في أول تعاون ما بينهم انهم يعرضوا الحاجات متزامنة في نفس الوقت وده حقق طبعا انه بيتعرض في الخليج بشكل كويس جدًا وفي الدول العربية كلها الشرق الأوسط من المحيط للخليج وفي نفس الوقت متشاف كويس عندنا في مصر، فـ عمل موازنة طبعا ماكنتش في بالي انها تحصل، كمان توقيت النزول جه من عند ربنا ان الدنيا ظريفة والحمدلله التركيز قوي على المسلسل وقدر انه يشد الناس، فـ دي كلها حاجات أسعدتني وسعيد جدًا بردود أفعال الناس كل الطبقات الاجتماعية كل الأعمار السنية كل الناس الحمدلله بتتفرج على المسلسل والتعليقات كلها ايجابية فـ طبعا دي حاجة مخلياني مبسوط الحمدلله.
هل سيحدث تحول درامي للعمل خلال الحلقات المقبلة ؟
آه طبعا، هو المسلسل فيه 3 تحولات درامية، التحول الأولاني بعد أول عشر حلقات.. يعني أول عشر حلقات كنا بنحكي قصة علاقة هند بجمال وحاتم وعلاقتهم القديمة، ومن الحلقة 12 لـ الحلقة 19 احنا بنتكلم من الجاني ومن القاتل وبنشك في ناس، ومن حلقة 20 في مفاجأة كبيرة جدًا هتظهر بتغير مجرى الأحداث تمامًا لغاية الحلقة التلاتين، فـ دي هتبقى مفاجأة كبيرة جدًا هتخلي الناس تشوف مش مهم مين اللي قتل وبيجروا ورا تداعيات اللي هيحصل في آخر عشر حلقات.
هل توجد منهجية معينة يتبعها وائل فرج في الاخراج ؟
أنا شخص دارس أكاديمية اخراج سينمائي ومُعاصر لكل المدراس الفنية من أول صناعة سينما لغاية دلوقتي، ولكن أنا اللي بيحركني أكتر لمنهجي الاخراجي بيختلف من مشروع لآخر، يعني يمكن يكون في مذاق شخصي عندي ودي حاجة أتمنى انها تكون حاصلة وده بس مش أنا اللي أقوله هما النقاد اللي يقولوه عني، لكن أنا شخصيًا اللي بيحركني في طريقة اخراجي من مشروع عن الآخر هو النوع
يعني نوع المشروع ايه.. هل هو كوميدي ؟ هل هو تراچيدي ؟ هل هو ساسبينس ؟ حسب نوع المشروع ببتدي أشوف رؤيتي ومنهجي الاخراجي والاستايل بتاع الاخراج في المشروع ده هيبقى عامل ازاي، قد يكون في استايل عام ليا وده أعتقد ان النقاد هما اللي يقيموه، ولما يبقى عدد الأعمال أكتر برضو يعني أنا بخرج ليا خمس سنين بس فـ أعتقد لما يبقى المشوار أطول والأعمال أطول ساعتها التقييم يبقى أوضح، بس أنا بالنسبالي كل مشروع هو اللي بيحركني اني اشتغله بشكل جديد ومختلف.
بما اننا مقبلين على أعمال دراما رمضان كيف ترى المنافسة الرمضانية من وجهة نظرك ؟
ربنا يوفق الناس كلها طبعا دايما ببقى مشفق على الناس في وقت رمضان والضغط العصبي وكله عايز يطلع شغل كويس وكله مستعجل والوقت بيجري، فـ أتمنى ان الموسم يكون في تنوع كبير والجمهور يستمتع بيه وأتمنى لزملائي انهم يقدروا يعملوا معادلة شغل كويس انهم يظهروا شغل كويس للناس في نفس الوقت الضيق والضغط العصبي اللي بيبقى موجود،
أنا شايف تنوع في أنواع المسلسلات اللي هتتعرض في رمضان يعني مستني ان شاء الله الحشاشين نفسي أشوف هيحصل ايه شوفت البروموهات واضح انه شغل كويس، مستني مسلسل مسار اجباري للمخرجة نادين خان، مستني مسلسل الساعة 5 اخراج هاني خليفة مع آسر ياسين، خالد دياب طبعا بيعمل مسلسل أشغال شاقة مستني أشوفه، خالد نور وولده نور خالد عاجبني أصلًا الاسم والتركيبة وبحب أستاذ محمد أمين جدًا وبحب شيكو وكريم محمود عبد العزيز أصدقائي بحب اشوف شغلهم، طبعا مسلسل الكبير ده ابني يعني أنا منتجت فيه 5 أجزاء قبل كده قبل ما أخرج فـ منتظره، وطبعا مكي والمخرج جندي دول يعني اخواتي وأصدقائي ودايما بتابع شغلهم والكبير طبعا ابني فـ مقدرش مشوفهوش.. أعمال كتيرة منتظرينها وان شاء الله يبقى موسم مُمتع للناس.
لكل عمل فني هادف رسالة.. ما هى رسالة مسلسل بين السطور ؟
أنا شايف رسالة بين السطور هى يعني الفكرة الأشمل هى النسبية ان مفيش شئ مطلق، مفيش صح وغلط مطلق.. مفيش خير وشر مطلق. الشخصيات والبني آدمين اللي خلقهم ربنا مفيش حد شرير ومفيش حد طيب احنا بشر لينا اخطائنا والحاجات الكويسة اللي بنعملها، بتحطنا ظروف قدام بعض اننا نعمل أفعال شريرة أو أفعال خطأ أو صواب كل واحد بيبقى محمل بحاجات بتخليه يتصرف تصرفات قدام شخص تاني، فـ بيحصل طول الوقت سوء التفاهم، الناس مش كلها ماشية على نفس الطريق ،فـ الحاجات كلها نسبية..الأحكام مينفعش تكون مطلقة الصح والغلط نسبي يعني أنا بالنسبالي الفكرة الأساسية هى النسبية مفيش صح مطلق ولا غلط مطلق.
