“المسرح مش تشخيص وخلاص، المسرح حالة ورسالة وقضية وهم، ولأول مرة هنشوفه جوه نسيج مختلف، من خلال 22 موهبة مصرية، يستحقوا الفرجة، هيخدونا معاهم في رحلة، نستعيد أجمل ذكرياتنا”.
بهذه الكلمات الرقيقة بدأ الفنان القدير “يحيى الفخراني” برومو مسلسل “تياترو”، الذي يضم 22 موهبةً مصريةً شابةً، دعمهم دكتور أشرف ذكي نقيب المهن التمثيلية، خلال قيامهم بمشروع التخرج تحت عنوان «المسرح وحشنا» ليقدمهم للجمهور بشكل رائع ويسلط الضوء على موهبتهم، برفقة المخرج رؤوف عبد العزيز.
وتشارك الفنانة الشابة هايدي كابوه في بطولة مسلسل تياترو وكان لمجلة هافن حوار معاها، كشفت لنا من خلاله عن ملامح شخصيتها في المسلسل، وعن كواليس المسلسل كما وجهت الشكر لكل من الفنان أشرف زكي والمخرج رؤوف عبد العزيز.
إلى نص الحوار..
حدثينا عن دورك في مسلسل تياترو؟
دور هايدي بنت بتحب المسرح وبتحب التمثيل أوي من وهي صغيرة وعندي صاحبي اسمه سعد يعتبر متربي في المسرح، وده اللي هيقدمه “عمرو عادل”، فـ هو صاحبي وأنا عايشة في الإسكندرية وباجي زيارات للقاهرة، فـ هعرف إن المسرح فتح وهدخل أبقى مبهورة جدًا، وهيعرضوا عليا إن أنا أشتغل وأنا مش عارفة حاجة أن التمثيل بالنسبة لي مجرد موهبة بالفطرة مش أكتر، وهيحصل أحداث تخليني أشتغل في الفرقة وأبقى فرد منهم.
وكيف تم ترشيحك لدور هايدي؟
عن طريق دكتور أشرف زكي ده كان مشروع تخرجنا كانت فكرة عنوانها المسرح وحشنا، ودكتور أشرف عزم ناس تيجي تتفرج علينا، والفكرة دي اتحولت لمسلسل تياترو وكلنا مكناش مصدقين إن ده ممكن يحصل أصلًا، وإن 22 ممثل شاب يكونوا أبطال المسلسل ومعاهم نجوم كبار.
وكيف كانت كواليس مسلسل تياترو؟
من أجمل الكواليس، طول الوقت بتضحكي وبتهزري أنا دائمًا حظي بيبقى مع صحابي، ودول صحابي ودفعتي هبقى محتاجة إيه أكتر من كده.
هل واجهتي صعوبات خلال التصوير؟
لأ خالص.. لأن إحنا خريجين المعهد العالي للفنون المسرحية فـ مفيش صعوبة هنواجها، إحنا طالبة المعهد العالي للفنون المسرحية، بالنسبالي أنا مواجهتش صعوبة في ده أنا اتبسطت.
الصعوبة الوحيدة اللي واجهتها وأنا بمشي وأنا راجعة لبنان وسيباهم، فـ دي الحاجة، اللي خلتني بعيط لأني مكنتش عايزة أسيبهم وأمشي عشان أنا بحبهم أوي.
المخرج رؤوف عبد العزيز دايما بيقدم مواهب جديدة للساحة الفنية.. إيه الرسالة اللي تحبي توجهيها له؟
أنا بجد من الناس المحظوظة إن أنا اشتغلت من الأستاذ رؤوف عبد العزيز، لأن أنا اكتشفت في البني آدم ده إنه بجد جميل أوي على المستوى الإنساني قبل الشغل، هو بجد بني آدم جميل أوي ومفيد أوي، بحس طول الوقت إنه بيحبني وبيعاملني على إني بنته، أنا بحب على طول العلاقات في الشغل تكون سلسلة وهو كان على طول محسسنا كلنا بده، على مستوى الشغل كان بيشجعني جدًا وطاقة إيجابية طول الوقت، وأحب أقوله “شكرًا على كل حاجة عملتها علشانا وأنا ممتنة للمسلسل إنه عرفني عليه”.
دكتور أشرف زكي ساعد على ظهور 22 موهبة شابة ..ما الرسالة التي تحبي أن توجهيها له؟
كل اللي إحنا فيه ده بفضل ربنا وبعده دكتور أشرف زكي، لأنه كان مؤامن بينا جدًا ومؤامن بالوجوه الشابة الجديدة وإننا ناخد فرصة كبيرة زي دي.
عايزه أقوله شكرًا على كل حاجة شكرًا على إنه طول الوقت معانا وفي ضهرنا ومش بس عشان المسلسل يعني على كل حاجة، بجد البني آدم ده بيتعب كتير أوي عشانا وعشان أي حد في الشغلانة، عشان هو عايز البني آدم اللي قدامه يكون كويس طول الوقت، عايز يشوفنا أحسن الناس ومش بيبقى مستني أي مقابل.
فـ أنا طول الوقت بحس إني ممتنه ليه أوي وبجد هو بيساعد أي حد في أي حاجة، بيساعدنا كلنا عايزة أقوله شكرًا من هنا لسنين كتير أوي قدام.
