• المخرج حلم إني بطلت مسلسل ستهم.
• أي ست تتعذب وتتظلم وتقدر تقف قدام الظلم تبقى ستهم.
• بفضل في حالة صراع بيني وبين نفسي لحد ما أدخل في تفاصيل الشخصية.
• كنت قلقانة من الشخصية بس حسيت اني لامسة ستهم واحاسيسها وتفاصيلها.
• والدتي أصيبت بشلل الرعاش وبقول للناس محدش ينام زعلان.
• لا يوجد خلاف بيني وبين أي زميلة بالفن.
حلت الفنانة “روجينا” ضيفة ببرنامج جمعتنا الليلة المذاع على قناة الظفرة، وتحدثت خلال الحلقة عن أحدث أعمالها الرمضانية مسلسل ستهم، حيث كشفت تفاصيل اختيارها لبطولة المسلسل وعن كواليس العمل، واستعدادها للشخصية، كما تحدثت عن طبيعة علاقتها بالفنانة “غادة عبد الرازق”، بالإضافة إلى حديثها عن مرض والدتها.
روجينا: “المخرج حلم إني بطلة مسلسل ستهم”
تحدثت الفنانة “روجينا” عن اختيارها لبطولة مسلسل “ستهم” واختيار المخرج رؤوف عبد العزيز لها، قائلة: “موضوع ستهم مش اختياري، وإحنا بنعمل مسلسل انحراف السنة اللي فاتت مع الأستاذ رؤوف عبد العزيز، كلمني في نص رمضان وقالي أنا حلمت إننا بنعمل مسلسل عن ست وحكى لي وقلت له لا الموضوع صعب أوي وحلم كمان باسم المسلسل”.
روجينا: أي ست تتعذب وتتظلم وتقدر تقف قدام الظلم تبقي ستهم”
وأشارت “روجينا” أن الجمهور ينظر إلى اسم المسلسل وستهم كأنه تعالي ولكنه في الحقيقة هو التركيز على المعنى، حيث أوضحت معنى ستهم، قائلة: “معنى ستهم هي أي ست تتعذب وتتظلم وتقدر تقف قدام المجتمع والظلم تبقى ستهم”.
روجينا: “بفضل في حالة صراع بيني وبين نفسي لحد ما أدخل في تفاصيل الشخصية”
وتحدثت روجينا عن كواليس استعدادها للشخصية، قائلة: “أنا بفضل في حالة صراع بيني وبين نفسي لحد ما أدخل في تفاصيل الشخصية، إحنا عملنا بروفات كتيرة للست وبعدين مراحلها في النقلة وبعدين الراجل، لا تتخيلي أنا يوم وأنا بعمل بروفا وصور للراجل أنا كنت متعصبة قد إيه”.
روجينا: “كنت قلقانة من الشخصية بس حسيت إني لامسة ستهم واحاسيسها”
وأضحت قائلة: “كنت متعصبة وقلقانة ومش مركزة وأنا بتصور أنا مركزة مع الناس، الناس بتبصلي إزاي، وقلقانة أنا هقدر ولا مش هقدر، أنا هكون قد شخصية زي دي ولا لأ، بس لما مشينا بستهم، أنا بقيت لامسة ستهم واحاسيسها وتفاصيلها يمكن أكتر مما كتابها استاذ ناصر عبد الرحمن، الدور في نقلات كتير اوي، فيه “فرح، حزن، حب” وفيه مجهود بدني”.
روجينا: “والدتي أصيبت بشلل الرعاش وبقول للناس محدش ينام زعلان”
وتحدثت روجينا عن مرض والدتها، قائلة: “جالها الشلل الرعاش وهي صغيرة أوي كان عندها 49 سنة، وعلشان كده بقول أوعى حد ينام زعلان يا جماعة”.
وتابعت: “والدتي كانت بتقولي أنا مؤمنة إني هخف في يوم من الأيام”.
واردفت روجينا: “المرض دا بيعزلك عن الناس وبيخليكي مش عايزة تشوفي حد وخصوصًا لو أنت شخص قوي، المرض بيبدأ بهزة في اليد اليمين ثم في الرجل، وأشرف ربنا يكرمه سأل وعرف الدكتور وعملت العملية ودلوقتي ماشاء الله ربنا يديها الصحة، وأنا صممت إني أنشر البوست وأشكر الدكتور لإني اكتشفت إن في حالات كتير زي أمي”.
روجينا: “لا يوجد خلاف بيني وبين أي زميلة بالفن”
وخلال الحلقة أوضحت روجينا عن طبيعة علاقتها بالفنانة غادة عبد الرازق، ونفت وجود أي خلافات بينها وبين أي زميلة بالفن، حيث قالت: “عمر ما كان فيه خلاف بيني وبين زميلة، غادة من الناس اللي بعد ربنا لها الفضل عليا، الست دي في مسلسل مع سبق الإصرار المخرج مكنش يعرفني وهي صممت عليا بس فيه مشهد زعلت منها مشهد مكنش فيه ضرب بالقلم وضربتني، أنا وقتها زعلت ومحمد سامي شاله في المونتاج”.
