حوار/ منار عبد الناصر
– أثناء تصوير الليل وآخره كنا نسرح في أداء الفنان يحيى الفخراني
– مشهد وفاة أخويا في الحرب ماستر سين الشخصية ومن أكثر المشاهد المحفورة في ذاكرتي
– تعلمت من نور الشريف الالتزام واحترام المهنة
– لا أرى مشكلة في ظهور البلوجرز ومشاهير التيك توك في بعض الأعمال الفنية
– لم أكن متابعًا للحركة السياسية لكن نكبة فلسطين أحدثت جلل كبير على الأمة العربية
فنان خفيف الطلة وصاحب وجه مألوف على الشاشة، ينتمي لأسرة فنية عريقة حيث أن والدته الفنانة سامية أمين ووالده الفنان مصطفى الدمرداش وزوجة عمه الفنانة الراحلة كريمة مختار، استطاع في بدايته الفنية أن يترك بصمة له في مجال الدراما، حيث قام بالتمثيل أمام كبار النجوم مثل الفنان الراحل نور الشريف وتألق في دور يحيى المنشاوي أمام الفنان يحيى الفخراني في مسلسل الليل وآخره، وتوالت أعماله الفنية فيما بعد، إلا أنه بعد رصيده الكبير الذي كوّنه عند جمهوره اختفى من الساحة الفنية بدون سابق انذار، وتواصلت مجلة هاڤن مع الفنان أحمد الدمرداش ليحدثنا عن سبب بعده عن الشاشة وحديث خاص عن كواليس أعماله السابقة ويكشف أيضًا عن جديده الفني، وإليكم نص الحوار..
بدايةً الجمهور يتساءل.. أين اختفى أحمد الدمرداش من الساحة الفنية على الرغم من بدايتك القوية؟
أنا جيت من بعد 2011 بعد ما حصلت دربكة في البلد فتحت لنفسي مجال آخر وسافرت برا مصر وقعدت سنين وبعدين رجعت وسافرت بلد تانية، وحاليًا رجعت مصر ومُستقر بقالي أكتر من سنتين.
هل كانت استراحة محارب ولا قرار بترك الفن؟
لأ كنت واخد بريك، أنا قولت أعمل لنفسي شيفت كارير لحد ما الدنيا تظبط تاني في شغلانة الفن وأشوف حالي.
حدثنا عن ذكرياتك مع شخصية يحيى المنشاوي في مسلسل الليل وآخره؟
طبعا العمل ده إخراج العظيمة رباب حسين وأنا كنت مرتاح جدًا معاها لأنها مخرجة بتعرف تتعامل مع الممثل وتطلع أحسن ما فيه، فـأنا كنت بشتغل المسلسل ده بمزاج عالي أوي أوي، وبالعكس مكنتش عايزه يخلص
وأستاذ يحيى الفخراني طبعًا الشغل معاه رهيب، يعني كانت مشكلتي معاه أنا والأستاذ إبراهيم يسري والأستاذة هدى سلطان والكاست كله لما كان المشهد بيبقى معانا وهو بيتكلم ومنتظرين يخلص الكلام عشان نبدأ نكمل كلامنا بس محدش كان بيكمل كلامه لأن كلنا كنا بنسرح في ادائه أساسا، فـهو كان مسلسل قوي جدا وجميل.
هل مازلت على تواصل مع الفنان يحيى الفخراني؟
آه طبعًا، بس قليل أوي لأن أنا لما سافرت بعدت عن الناس كلها باستثناء صحابي المقربين في الوسط فضلوا صحابي اللي هما عشرة العمر.
مشهد حدث أثناء تصوير الليل وآخره محفور في ذاكرتك؟
آه طبعا مشهد وفاة أخويا في الحرب، كنت قلقان من المشهد ده لأنه مشهد ماستر سين ليا ومشهد مهم في مسلسل مهم
وفضلت أذاكر ولما روحت اللوكيشن لقيت أستاذة رباب أول ما دخلت لسه هقولها أنا قلقان من المشهد ده قالتلى أنا مش عايزاك تكلمني في المشهد ده
اقعد مع نفسك ولو عايز تتكلم فيه لما نيجي نصوّره، وبعدين لقيتها فجأة جات ومسكت المايك وقالت للاستوديو كله لو سمحتوا عايزين صمت لمدة ساعة وقت ما أحمد يحب يبدأ في المشهد احنا جاهزين وهو يتكلم وقت ما هو يحب، فالبتالي ادتني مساحة من الإحساس والراحة النفسية خلتني أعمل المشهد براحتي أوي وطلع مشهد رائع.
وماذا عن كواليس مسلسل حضرة المتهم أبي مع الراحل الكبير نور الشريف؟
والله أستاذ نور بالنسبالي غير أنه هو أستاذ وحاجة لا تُوصف هو صديق كان مدي مساحة للكلام والحوارات الشخصية، جيت في المسلسل ده قبل ما نصور، أنا اعتذرت الأول شوية مكنش عندي نية أوي للدور لأن ساعتها كنت بطل خلاص وبعمل مسلسلات من بطولتي فقولتله أنا عايز أبقى البطل اللي في المسلسل مش دور، قالي لأ المسألة مش كده انت دورك جامد ومهم جدا جدا وانت هتعمله جامد أوي وهيفرق معاك في حياتك كلها فقولتله بس أنا كده هبقى بنزل خطوة وفي الآخر قالي لا بالعكس انت مش بتنزل انت بتثبت خطواتك.
وماذا اكتسبت من الفنان نور الشريف على المستوى المهني والإنساني؟
على المستوى المهني طبعا اكتسبت الالتزام بنسبة 100% واحترام المهنة واحترام الآخر واحترام كل الناس العاملين في الشغلانة، عشان وأنا بشتغل ميبقاش عندى مشاكل مع حد، بالعكس والناس تبقى بتحبني وأنا بحبها وبالتالي الشغل يبقى لطيف وأنا مرتاح نفسيًا.
على المستوى الإنساني هو كَسر عندي حاجز خلاني فعلا أعيش براحتي في الحياة حتى لو أنا فنان وليا أعمال، وهو الأستاذ نور كان كده.. يعني يبقى في حياتي نفسها طريقة في التعامل مختلفة عني أنا عشان أنا نجم
لا هو الاستاذ نور كان بيتعامل عادي في الشارع ويدخل يشتري ويقعد ويتكلم مع كل الناس
فـ دي أهم حاجة انك ملتصق بالناس طول عمرك لأن الناس دي مصدر شغلك والهامك ومصدر الشخصيات فـ تتعامل معاهم ببساطة.
من وجهة نظرك.. كيف ترى الفن اختلف قديما عن الآن؟
اختلف طبعا بنسبة كبيرة جدا.. أولا في الموضوعات اللي بتتقدم وده بيختلف على حسب الزمن، والفترة اللي كنت بقدم فيها مسلسلات الفترة اللي قبلها بعشر سنين برضو مختلفة تماما عن الفترة بتاعتي ف ده طبيعي
واختلف طبعا في مستويات كل حاجة زي مستويات التمثيل والإخراج والإضاءة والديكورات ومستوى كل حاجة في الدراما اتطورت بمقام عشرين تلاتين سنة مش عشر سنين.
قمت بالتمثيل مع أكبر النجوم في بدايتك الفنية، فماذا عن شعورك في ذلك الوقت؟
والله هو طبعا كان في رهبة كبيرة جدًا والواحد بيبقى قلقان بزيادة بس أنا بمثل من وأنا صغير أوي اصلا من قبل ما أبقى معروف فـ كانت الرهبة عندي مش بالقوة المطلوبة، لكن كان في رهبة رهيبة برضو لكن كنت بشوف ناس تانية الرهبة أعلى شوية والرهبة عندي مكنتش في الخوف من الفنان نفسه إنما كانت في مسئولية الوقوف أمام النجم لأن كان عندي احساس اني طالما هقف أمام النجم ده، فـنسبة مشاهدة الناس ليا هتبقى أكبر واضعاف ما أنا بعمل المسلسلات التانية فالبتالي بقى عندي الرعب ده اللي هو الخوف من المسئولية واني هتشاف بشكل قوي فـ لازم ابقى كويس.
ما رأيك في ظاهرة ظهور البلوجرز ومشاهير التيك توك في بعض الأعمال الفنية؟
يعني أنا مش شايف أنها فيها مشكلة خالص على فكرة.
لكن ناس كتير هاجمتهم؟
طبعا لأنهم جايين على حق ناس بس هى الفكرة في اعتماد المخرج والمنتج على نسب مشاهدات السوشيال ميديا ده اعتماد كاذب يعني ده مش حقيقي، لأن أنا لما بعمل مسلسل مثلا الحاج متولي أو أي مسلسل الحلقة الواحدة بتتشاف أضعاف المشاهدات اللي انتي بتقريها على السوشيال ميديا لأن في السوشيال ميديا بتكتب المشاهدات لكن في التليفزيون مبتتكتبش فـبيكون التقييم حر
لكن في السوشيال ميديا الناس بتبص على أرقام بس وبالتالي ده بيضرهم لأنهم لما يختاروا هيختاروا على الأرقام والأرقام موضوع تاني وملهاش أدنى علاقة بالفن، لكن فكرة إن واحد بلوجر يجرب في دور وينجح أو يفشل دي حاجة عادية؛ لأن في ناس مش بلوجر و بيجربوا عادي لأن الفن مش مقتصر على حد معين بس في تقنين للموضوع
مينفعش حد معندهوش مقوّمات التمثيل ويستمر بالعافية عشان عنده علاقات، ولا ينفع بلوجر عشان عنده نسب مشاهدة يفضلوا يجيبوه حتى لو هو سئ
لأ هو البلوجر لو عمل دور واحد وطلع حلو اجباري هيشتغل ولو سئ يبقى خلاص فشل فـالموضوع نسبي.
كيف كانت علاقتك بالراحلة القديرة الفنانة كريمة مختار؟
هي في مقام ماما وهى مربيانا واحنا أسريين مترابطين ومتشابكين الحمدلله وأنا والدتي فنانة كبيرة الفنانة سامية أمين الله يرحمها، فـهى بالنسبالي عمري ما حسيت أنها الفنانة كريمة مختار خالص لا هى كانت عمتو ده غير أنها ست حنينة وطيبة جدا وبتعرف تدلع كل الناس اللي حواليها في كل الأعمار.
هل من الممكن أن نراك في عمل قريبًا؟
آه والله أنا في حاجة دلوقتي بقرأها لسة جياني بقالها اسبوع وهو عمل دراما باذن الله وحاجة كويسة ولطيفة بس لسة مفيهاش دن.
وما تعليقك على الأحداث الجارية في غزّة؟
قبل ما أقول تعليقي أنا حابب أقول معلومة أنا أبعد ما يكون عن اني أكون بتابع الحركة السياسية والأخبار، لكن ده خبر جلل مالهاش علاقة باللي زيي حتى اللي مش متابعين حاجة ده شئ مؤثر وشئ الناس كلها حست بيه وشافته طبعا تعليقي أنها نكبة كبيرة جدًا على الفلسطينيين وعلينا وعلى الأمة العربية كلها وربنا إن شاء الله هيزيح الغمة دي والناس دي يرجعوا بيوتهم سالمين غانمين باذن الله يارب.
