*حبي اللكورة كانت سبب وجودي على السوشيال ميديا
*الهضبة عمرو دياب هو قدوتي ومثلي الأعلى في النجاح
*نصيحتي لمتابعين السوشيال ميديا ركز على اللى يفيدك منها فقط
مذيع شاب ومثال لعدد كبير من الشباب الناجح في بلدنا، دخل عالم الشهرة من خلال السوشيال ميديا عرف هدفه وقرر أستغلالها بالشكل الصحيح، ليكون النجاح والحظ حليفه، بدأ من خلال فكرة ليصبح برنامج أستثنائي في عالم الفن ويضع اسمه بين المحاورين لعدد كبير من نجوم الصف الأول في الفن.
مبدأه في الحياة العمل والأصرار هو طريق النجاح، يحاول دائما أن يطور من نفسه وشغفه، ويعمل في أكثر من أتجاه ليصل لمراده في نهاية الطريق أنه المذيع الشاب خالد محفوظ.
وكان لمجلة هافن حوار خاص ومميز معه عن مشواره وبرنامجه الناجح “تسمحلى بالمشية دي”:
متى كانت البداية مع رحلة السوشيال ميديا؟
من وانا صغير كنت بلعب كوره وكنت بحب اتصور جداً وبحب الكاميرا وتوثيق اللحظات دي، لكن فعلياً بدأت في السوشيال من وقت الكورونا والناس بدأت تمسك تلفونها أكثر وتستخدم السوشيال ميديا والتيك توك
وبدأت أعمل فيديوهات على مقاطع أفلام وبدأت تعجب الناس وانشهرت شوية، فقلت لأ عايز أبقى مختلف بدأت أعمل عن الحاجة اللى بحبها وهى الكورة، وعملت تحديات وعجبت الناس ومن هنا جاتلى فكرة برنامج وكان عن الكورة ودخلت فيه جزء فني برضو عن المسلسلات والأفلام، وجاني عرض من قناة تلفزيونية وأثناء البروفات والتحضير شوفت نفسي في الحته دي وهي محاورة الضيوف لكن الموضوع لم يكتمل، وبعدها جاتلى فكرة برنامج “تسمحلى بالمشية دي”.
ما هي أكثر الصعوبات التي واجهتك في بداية مشوارك؟
الصعوبات هي أن أنا من أسكندرية وهي بعيدة شوية عن النجوم والفعاليات ومجال الفن عموماً، وثانيا هى أن مفيش حد من عيلتى أو أصحابي في المجال الفني إطلاقا فكنت بشارك في أي فرصه صغيرة تكون قدامي سواء تنظيم تطوع أو غيره، وفي البداية مكنتش عارف أنا عايز اعمل ايه بالظبط فكنت بجرب في حاجات كتير لحد ما وصلت للحاجه اللى بحبها ولاقيت نفسي فيها.
كنت بشارك في أي فعاليات تنظيم أو تطوع وجاتلى فرصة أن أنظم في مهرجان الجونة وكنت لسه في سنة أولى جامعة، و مسكت في الفرصة وكل سنه كنت بنظم واتعرف على ناس جديدة، وبعد فترة السوشيال ميديا واترفضت من برنامج كويس، فجتلى الفكرة أن اشتغل على برنامج “تسمحلى بالمشية دي”.
وكان في فكرة كده في دماغي عن البرنامج أن أعمل لقاء مع نجم واحنا بنتمشي على المارينا في الجونة وفي أيدي سماعة كبيرة، وفضلت أشتغل وتطور من نفسي والبرنامج، وقدمت الموسم الأول والثاني مع نجوم كبيرة وليها اسمها، وكل موسم بكون حريص على تطوير البرنامج والاسئلة والأخراج والتيم اللى معايا.
استضفت في برنامجك العديد من النجوم.. من النجم الذي تتمني أن تقول له “تسمحلي بالمشية دي”؟
أنا الحمدلله عملت لقاءات مع اكتر من 25 نجم، لكن النجم اللى أقوله تسمحلى بالمشية دي هو الهضبة والحظ ومثلي الأعلى عمرو دياب ده بالنسبالى مثلي الأعلى في النجاح والأصرار.
ماشاء الله فوق الأربعين سنه بيتطور وبينجح مش بيركز مع أي هجوم أو انتقادات، الشخص ده بالنسبالى ملهم جدا ومش هقوله بقي تسمحلى بالمشية دي هقوله تسمحلى بالقعده دي فهو عمرو دياب وبشده طبعاً.
السوشيال ميديا سلاح ذو حدين.. لماذا يتجه معظم الشباب للاستخدام الخاطئ السوشيال ميديا؟
في ناس بتستخدمها بطريقة غلط وفي ناس بتستخدمها بطريقة صح برضو، يعني خلينا نبص لنص الكوباية المليان في ناس كتير لتستخدم السوشيال ميديا صح وبتنصح الشباب أنها تشتغل صح وازاى يكون ناجح.
لكن الناس اللى بتستخدمها بطريقة غلط مش عارف يمكن لأن مفيش حد يوجههم أو يقولهم ده غلط، هو اكيد عليهم ذنب والذنب على الناس اللى حواليهم كمان.
لديك العديد من المتابعين على السوشيال ميديا.. ماهي الأسس التي تعتمد عليها في تقديم المحتوى الخاص بك؟
في البداية لما كنت بعمل مقاطع فيديو عن الأفلام وهكذا كان عدد المشاهدات كبير، ولما بدأت أعمل فيديوهات توعيه العددل قل لكن أنا ركزت على العدد الأقل، لأن مش بيفرق معايا العدد الكبير على قد مابيفرق معايا أقدم محتوي صح يفيد المتابعين، فهذا رأيي في هذا السؤال هو التركيز على ما تقدمه والمتابعين يستفادوا أفضل ما يكون لديك عدد كبير من المتابعين بدون تقديم أي محتوي جيد.
يعتقد معظم الشباب أن السوشيال ميديا هي وسيلة للربح الكثير هل هي كذلك فعلا؟
في العديد من المنصات بتقدم ربح بالفعل مثل اليوتيوب لكن ليس شرط أن يكون الربح هو فلوس، ممكن شهرة تفيدك في شئ آخر ممكن تكون بتقدم محتوي جيد من خلاله يجيلك عمل آخر، فهي منصة تسويق جيده لشغلك.
كيف يبدأ الشخص في تقديم محتوى جيد وما هي العوامل التي يعتمد عليها؟
أي شخص يريد أن يقدم محتوي لازم يكون مصدقه، أنا لأن كنت بحب الكورة ولسه بحبها قررت أن اقدم عن ده واطلع بصوتي وشكلى لأن دي حاجه أنا بحبها ومصدقها، ولازم نذاكر كويس ونشوف السوق عايز ايه وأيه أكتر منصه هتساعده على تقديم المحتوي بتاعه.
كل هذا مهم جداً ولازم الكل يقدم محتوي خاص به لأن ده هيفيد بعدين في الوظائف، اكيد مش كل الوظائف لكن على الطرف التاني في طرق كتير تقدر تسوق بيها لنفسك على السوشيال ميديا.
ما هي نصيحتك للمتابعين لاستخدام السوشيال ميديا بالطريقة الصحيح؟
طبعا نصيحتي ليهم بلاش يستخدموها كتير ويضيعوا وقتهم عليها، لكن يتابعوا المهم ليهم واللى هيفيدهم في شغلهم، يعني أنا بحب اتفرج على مسلسلات وأفلام وبرامج كتير سواء سياسي أو رياضي أو فني، لأن أنا متأكد انها حاجه هتفدني في شغلى وأفكار لذيذه.
ما هي خطواتك الفترة القادمة؟
خطواتي اللى جاية أن تطور نفسي في البرنامج وأقدم موسم جديد ومختلف، وحته وجودي كمذيع شاب عندي برضو كام مشروع مختلف شوية عن الفن، وعايز أتجه شوية في الرياضه، وكمان شغل الأساسي اللى هو الدعاية.
ومبسوط جداً أن برنامجي “تسمحلى بالمشية دي” عمل ردود أفعال كويسه جداً الموسم ده، وردود الأفعال والأراء كانت كويسه وأن الناس لاحظت تطوير وتصوير وشكل البرنامج.
ومبسوط أنه عجب الناس وكان موسم لذيذ وأستثنائي وعجب ناس كتير.
