حوار شروق راضي
يعد الفنان أحمد عبد اللاه مصمم معارك وممثل مصري عمل على تنفيذ معارك بعض الأعمال الفنية ومنهم مسلسل “الاختيار” و”الحشاشين” وشارك في العديد من الأعمال السينمائية منهم فيلم “حرب كرموز” عام 2018.
وفي الساعات الماضية تصدر أحمد عبد اللاه مؤشرات بحث جوجل ومختلف تريندات السوشيال ميديا عقب ظهوره بدراما رمضان 2024 من خلال تجسيده لشخصية “البني” واستطاع خطف الأنظار بقوة في مسلسل العتاولة.
وفي حوار خاص لمجلة “هافن” تحدث الفنان أحمد عبداللاه عن عدة مواضيع مختلفة سوف نستعرضها خلال السطور التالية:
كلمنا عن مسلسل العتاولة وعن دورك والنجاح الذي حققه المسلسل ؟
الحمد لله رب العالمين النجاح فوق اللي كنا متوقعينه، أما عن دور البني، المخرج أحمد خالد موسى هو اللي رشحني للدور ده وقالي عايزك تعمل معايا دور في المسلسل هو مش كبير أوي بس دور حلو فقلت له ماشي تمام أنا معاك، لأن أحمد خالد صاحبي واشتغلنا مع بعض من زمان جدا.
والمخرج أحمد خالد موسى صاحب الفضل بعد ربنا ، وتوجيهاته هي اللي خلت شخصية البني قريبة من الناس وكان بيقولي متمثلش خليك على طبيعتك قول الكلام من غير تمثيل حسه و قوله كأنك قاعد بتتكلم معايا ،ونجاح شخصية البني الفضل الأول والأخير يرجع لربنا ثم ٲحمد خالد من اللبس للتمثيل لإن فكرة إن البني يلبس بني هي فكرة احمد خالد.
هل دورك في المسلسل اقتصر على التمثيل فقط ولا صممت مشاهد أكشن فيه ؟
اشتغلنا اكشن وإحنا ماشيين قالي أنا عايزك تعمل معايا دور في المسلسل والدور فضل يكبر يكبر لحد ما شوفناه بالشكل ده.
اشتغلت مع فنانين كتير قولنا سر عن السقا محدش يعرفه في الشغل معاه ؟
اشتغلت مع كل النجوم تقريبا الحمد لله وده شرف ليا طبعا.
أحمد السقا كل الناس عارفه أن هو شخصية جدعة جدا ومحترم جدا وبيحب الناس وبيحب يساعدهم، بس اللي أنا عايز اقوله أن هو في اللوكيشن بيساعد كل الناس وكل الممثلين وعلى المستوى الشخصي ساعدني كثير جدا واحنا بنصور المشاهد مع بعض.
وأنا مبسوط جداً جداً إن أحمد السقا صاحبي على المستوى الشخصي وشغالين مع بعض بقالنا 20 سنة مثلاً فهو شخصية من أحسن الشخصيات الموجودة في مصر.
تعاونت مع السقا في حرب… حدثنا عن الشغل معه؟
أحمد السقا السنة اللي فاتت اشتغلت معاه في حرب فعلاً والسنة دي عملنا مع بعض العتاولة .. وأحمد السقا مش متعب خالص مريح جداً فوق ما تتخيلوا يعني في شغل الاكشن بنرسم الحكاية وبنعملها وبنعمل عليها بروفات حتى لما باجي اشرح له الخناقة مثلاً اللي هتحصل في المشهد هو بيبقى مبسوط لٳنه بيحب الاكشن جداً فبيشاركنا وبيعدل معانا وبيضيف الحاجات اللي هو بيبقى شايف ان هو هيعملها احسن من اللي احنا عملناها.
فا السقا حد مريح جداً جداً في الشغل ملوش اى متطلبات خالص بيخش يقول هنعمل ايه يا جماعة انتم عايزين تعملوا ايه وبعدين بنعدل على الحكاية المعمولة وهو من أكتر الشخصيات المريحة في الشغل على المستوى البدني وعلى المستوى الشخصي وعلى المستوى الفني فمهما قولت عن أحمد السقا مش هعرف أقول إيه هو أيقونة الأكشن في مصر إحنا عارفين ده من زمان جداً.
حدثنا عن مشاركتك في مسلسل الحشاشين.. وهل فعلاً تصميم مشاهد الحرب بيكون صعب ؟
الحشاشين مسلسل من أصعب المسلسلات اللي عملتها في حياتي بقالي 22 سنة بعمل الاكشن في المسلسلات من ٲصعب الشغلانات اللي اشتغلتها لٳن الحقبة التاريخية اللي بيكون لها أكثر من عنصر في الأكشن دي بتكون صعبة جدا، لأننا مش بنستخدم البني ادمين بس في الاكشن لا إحنا كمان بنستخدم الأحصنة فٳحنا كنا بندرب الأحصنة علشان تعرف يعني إيه معركة، لأن ٳحنا في مصر معندناش الأحصنة دي لكن بره مصر موجود الأحصنة دي بتبقى متعودة على الاكشن ومتمرنة وبتبقى عارفة هتعمل إيه بالظبط.
لكن عندنا في مصر ما فيش الكلام ده طبعا وكان لازم الأحصنة تتمرن على الموضوع ده وإزاي في المعركة واحصنة بتقع واحصنة بتجري وناس بتضرب بالسيوف والحصان طبعاً ما بيفهمش الكلام ده فكان لازم تتدرب، ونصنع سيوف ونصنع رماح ونصنع أسهم ودروع.
الحكاية مكنتش عنصر واحد الحكاية فيها كذا عنصر ده بالإضافة للمعركة بيكون فيها أعداد كبيرة جداً من الممثلين ما بين الخيل والأسلحة فكل تنظيمة وترتيبة من اصعب الاعمال اللي بتقابلنا وخصوصاً ان احنا مبنعملش النوعيه دي كل سنة ف الحاجات دي ما بتكونش متوفرة كتير علشان كدة خدنا شهور كثير جدا في التجهيز وشهور أكثر في التدريب ودي تجربة من اصعب التجارب اللي مريت بيها في حياتي.
الحمد لله أنها طلعت بالشكل المطلوب والشكل اللي يشرفنا احنا كمصريين في النهاية.
من وجهة نظرك الشغل أصعب مع الرجالة ولا مع الستات ومين اللي تعبك من الستات في الشغل معاه وخصوصا الأكشن ؟
الشغل بيبقى صعب دايما لما ما بيبقاش له تجهيز للحكاية هنا بقى بيكون الشغل صعب سواء مع رجالة أو ستات، لكن لو احنا مجهزين من بدري بيكون في تدريب على الحكاية فبالتالي بتكون سهلة في التصوير.
لكن الحمد لله النجوم اللي إحنا بنشتغل معاهم لحد دلوقتي سواء رجالة أو ستات بيكونوا متعاونين جدا وبيكونوا عايزين يقدموا حاجة شكلها كويس وده بيساعدنا كتير.
لحد دلوقتي مفيش حد تعبنا الحمد لله في المشاهد اللي احنا بنعملها في الأكشن ولا رجاله ولا ستات.
من وجهة نظرك إيه أكثر صعوبة بتواجهك في شغل الدراما؟
أصعب حاجة في شغل الدراما في المسلسلات خصوصا اللي بتتعرض في رمضان هو عامل الوقت، لأن إحنا بندخل متأخر جداً وبيكون في اوقات مابيكنش عندنا وقت نلحق نعمل فيه حاجة فالحكاية بتكون صعبة جداً في موضوع الوقت.
وياريت المنتجين تسمعنا وتدخل بدري علشان نقدر نقدم ٲحسن حاجة دايما.
وهل شغل الدراما بيختلف عن السينما؟
اه طبعاً شغل الدراما بيختلف تماماً عن شغل السينما خالص لإن عدد المشاهد اللي بنصورها في اليوم في السينما أقل بكتير من اللي بنصورها في الدراما والسينما بيبقي تحضيرها أكتر من الدراما عشان عامل الوقت بيبقي متوفر في السينما غير الدراما.
السينما مبتبقاش مرتبطة بوقت عرض لأن السيزون بتاعها بيكون في عيد الفطر وعيد الأضحى والصيف فهي بيكون لها أوقات محددة فبيكون عندنا وقت كبير يعني مثلا ممكن نقعد يوم كامل نصور مشهد واحد بس، لكن في الدراما ده مستحيل يحصل طبعاً الا في الحاجات الكبيرة بس.
زي مثلاً الحلقة ال 11 من مسلسل الحشاشين قعدنا نصورها من 15 يوم ل 17 يوم علشان دي حلقة كاملة وطبيعة المسلسل كانت مختلفة، فكنا بناخد تايم كبير في التصوير فطبعاً السينما مختلفة تماما عن الدراما.
بدايتك في مجال تصميم المعارك كانت من امتى ومين أول حد اشتغلت معاه؟
بدايتي في تصميم المعارك كانت في 2003 بتصوير كليب مع المخرج وليد محمود وفريق كان لسة طالع اسمه باد بويز وكان فيها حلبة ملاكمة وبعض مشاهد الكاراتيه.
وٲول عمل بعدها كان فيلم حبك نار للنجم مصطفى قمر ومجدي كامل وٳخراج ٳيهاب راضي.
مين اللى انت نفسك تشتغل معاه في مجال تصميم مشاهد الأكشن ؟
الحمد لله أنا اشتغلت مع كل النجوم الكبار منهم كريم عبد العزيز احمد عز امير كرارة احمد السقا مصطفى شعبان فا الحمد لله رب العالمين اشتغلت مع كل النجوم.
ولو أنا نفسي اشتغل مع مين تاني فنفسي ٲفضل اشتغل معاهم، لأن الحمد لله رب العالمين اشتغلت مع كل نجوم الاكشن.
مين أفضل ممثل أكشن انت شايفه موجود حاليا؟
مش هقدر أقول واحد لأن إحنا معندناش واحد هو الأفضل ومن وجهة نظري الشخصية إحنا عندنا مجموعة هي الأفضل في الأكشن، ومنهم ٲحمد السقا ومصطفى شعبان وٲحمد عز وٲمير كرارة وعمرو يوسف عندنا نجوم كتير جدا هما الٲفضل في الأكشن، فكلهم مفضلين بالنسبة لي وكلهم قدمت معاهم شغل كويس وساعدوني كتير في الأكشن علشان يطلع بالشكل الصح والأفضل فصعب ٲقول شخص واحد الٲفضل.
إيه اللي ينقصنا في تنفيذ مشاهد الأكشن حتى نوصل للعالمية ؟
إحنا مفيش حاجة ناقصانا غير اننا يكون عندنا الوقت الكافي علشان نقدر نعمل بروفات ويكون عندنا ميزانية تقدر تحقق لنا مطالبنا في أننا نخرج الأكشن بشكل كويس وده شفناه في مسلسل الحشاشين لما اخذنا الوقت المناسب للتدريب والتصوير ولما اتحطت ميزانية تغطي طلباتنا خرج أكشن الحمد لله رب العالمين الناس بتقول أن هو واصل للعالمية فهي الحكاية وقت وفلوس لكن الامكانيات وكل حاجة عندنا الحمدلله موجودة.
وفي نهاية الحوار نكون قد تعرفنا أكثر على الفنان أحمد عبداللاه.
