حوار/ منار عبد الناصر
•أكثر ما استفزني في شخصية جمالات هى الطيبة الزيادة
•من ردود الافعال المضحكة ان الجمهور قال مين بيلعب في الثوابت يا جماعة احنا اتعودنا على رحاب الجمل شريرة
•أمير كرارة باشا الأخلاق وأنا من جمهوره
•المائدة الرمضانية لهذا العام مليئة بدراما مصرية أصلية أصيلة
فنانة من العيار الثقيل ونجمة موسم دراما رمضان لهذا العام، اعتاد عليها الجمهور في ثوب أدوار الشر، لتُفاجئ الجمهور في ماراثون دراما رمضان الحالي بثوب درامي جديد ومختلف، لتتألق وتلمع في مسلسلات رمضان 2024 بأدوار الطيبة والخير، هى السوبر ستار الفنانة رحاب الجمل التي تشارك في مسلسل بيت الرفاعي مع باشا مصر أمير كرارة بدور جمالات وفي مسلسل صدفة بدور حنان، وتواصلت معها مجلة هاڤن ليدور حوار متميز عن كواليس مشاركتها في الأعمال الرمضانية
رحاب الجمل.. تخوضين السباق الرمضاني لهذا العام بعدة أعمال أبرزهم صدفة وبيت الرفاعي
ما التحديات التي واجهتك في المشاركة في أكثر من عمل ؟
طبعا كان شئ مُرهق جدا بالنسبالي نفسيًا وصحيًا وجسديًا وفي الوقت كمان كان عندنا مشكلة كبيرة في الوقت؛ لأن الدورين كُبار وفي وقت كبير أوي محتاجينه لكل دور عشان نصور بس الحمدلله الشركتين كانوا فاهمين ده ونسقوا مع بعض بس أنا كنت مرهقة جدا لأن كنت بخرج من اللوكيشن ده أروح اللوكيشن ده وده كان فيه صعوبة تانية.. فكرة اللغبطة اني ابقى متقمصة شخصية ومتوحدة مع شخصية منهم، وكان في تضارب في المواعيد طبعا بس هما كانوا بيحلوها لكن أنا بالنسبالي كان التضارب في الشخصيات اللي بتضرب في دماغي شخصيتين عكس بعض وببقى رايحة اللوكيشن مركزة جدا أنا رايحة اعمل اي شخصية وتفاصيلها عاملة ازاي واستخدام الصوت لأن حتى الصوت اللي مستخدماه في حنان في صدفة غير جمالات في بيت الرفاعي وده طبعا مرهق ومفيش أي تحديات أنا كنت مترمطة.
سأبدأ معك بالحديث عن مسلسل بيت الرفاعي.. كيف كانت تحضيراتك لتركيبة جمالات ؟
الورق مكتوب حلو أوي، وتركيبة جمالات لأنها جديدة عليا خوفتني في الأول بس تحمستلها جدا طبعا ولما كلمت المخرج الأستاذ أحمد نادر جلال قولتله غريبة انك شايفني طيبة الناس كلها بقالهم خمس ست سنين اتعودوا على اني أنا الشريرة فـ قالي ما هو ده اللي أنا عايز أعمله أنا مبجيبش ممثل يعمل حاجة عملها قبل كده انا بحب أغير والممثل الشاطر بيعمل كل حاجة وانتوا كلكم شُطار وأنا واثق فيكم وكلكم هتتحطوا في حاجات جديدة وده فعلا لما دخلت لقيت حلبة مصارعة كلنا جامدين وكلنا مذاكرين ومركزين ومفيش حد فينا بيعمل حاجة عملها قبل كده وده كان جزء من الحماس اللي جوايا ان في ممثلين جامدين حواليا فـ أنا بقى بشد مذاكرة وتركيز عشان أحقق حاجة.
ما أكثر شئ استفزك في جمالات ؟
الطيبة الزيادة أوي؛ لأنها عكس كل اللي قدمته قبل كده..الجدعنة الزيادة مع اخواتها، الحب اللي مالي قلبها حتى لمرات أبوها، احتوائها لبيت الرفاعي، وقوتها في انها تحتوي العيلة دي واخواتها، وتحاول تحل مشاكلهم وتدافع عن اخوها ياسين بكل قوتها ومُصرة وهى أول واحدة آمنت بقضية ياسين وانه برئ وكانت بتعيط لأمه اللي خلفته وتقولها انتي ممكن تصدقي انه يعمل كده، هي حبته وحست بيه وصدقت ان اخوها بريء من قبل أمه نفسها ما تعترف بـ كده، طبعا صعبة انك توصلي ده للمشاهد ويصدقك انك اقربلك من أمه وانك أكثر من والدته ايمان بيه وعارفة أكتر من أي حد في العيلة انه انسان نضيف دي صعبة.
وماذا عن كواليس العمل مع باشا مصر الفنان أمير كرارة ؟
ده باشا الأخلاق، الكبير بأخلاقه نجم الأدب يعني أنا دايما بقولها أنا من معجبين أمير كرارة ومن الفانز بتوعه وبحب أشتغل معاه؛ لأن ليا تجربه معاه في مسلسل اسمه حكايات بنعيشها الكلام ده كان من سنين طويلة وكان نفسي التجربه دي تتكرر والحمدلله اتحققت واتكررت لأن انا بحبه كممثل وانسان، هو رغم انه السوبر ميجا ستار لكن هو في الكواليس متواضع جدا وزي التلميذ موهوب وبيسأل وبيذاكر ودؤوب وبيحترم زمايله، بيحترم شغله، وملتزم جدا أول واحد فينا بيجي، لا في نجوم بشتغل معاها بتعلم منها أمير كرارة منهم يعني منتهى الالتزام والاحترام لزمايله ومنتهى الاحترام لتعليمات المخرج وبيحس بالمشاهد وبيحس بزمايله، وعلى المستوى الانساني أنا بحبه جدا هو من أقرب الناس لقلبي.
هل تتابعين ردود الأفعال ؟ وما رأيك فيها ؟
آه طبعا، أنا ضحكت جدا كان في حاجه كده زي كوميكس بيعلقوا بيقولوا مين اللي بيكسر الثوابت يا جماعة من أول رمضان كده تكسروا الثوابت رحاب الجمل تعمل طيبه بعد ما اتعودنا عليها سنين طويلة شريرة لأ وطيبة مش عادي دي بتدي لأخوها فلوس وبتبيع له الدهب وبتخاف عليه لا لا، وهما مصرين انها في الآخر هتطلع شريرة وبيقولوا يمكن هى اللي هتطلع قتلت أبوها وطول الوقت بشوف ده وبضحك جدا وبحس الناس متفاعلة معايا جدا وفي تواصل روحي بيني وبين المشاهدين وبحبهم كلهم لأنهم متفاعلين مع رحاب الجمل ومع جمالات ومع عبير في البرنس وحاطين كل ده مع بعض في سلة واحدة.
هل سيحدث تحول درامي لجمالات في الحلقات المقبلة ؟
آه طبعا في تحولات كتيرة جاية.
ما أكثر شئ ستفتقديه في لوكيشن بيت الرفاعي ؟
كلهم والله العظيم كلهم يعني لسة بقول لصديقة ليا أنا اتعودت عليهم واتعودت انهم اخواتي بجد حبيت ميرنا جميل تامر نبيل ملك قورة امير كرارة ده على راسنا كلنا لان ده انسان وأخلاق فـ أنا هفتقدهم كلهم وصدقت فعلا أنهم اخواتي وعشت ده حقيقي حبيتهم بجد وصدقت خوفي عليهم وأنا مرتبطة بيهم نفسيًا، أنا معرفش لما نخلص تصوير هيحصل ايه بس انا عارفة اني هبقى مضايقة جدًا.
هل تتابعين أعمال فنية أخرى غير التي تشاركين بها ؟
والله شوفت حاجات سريعة عجبني جدًا أعلى نسبة مشاهدة عجبتني ليلى زاهر وانتصار وسلمى أبو ضيف ومحمد محمود وفرح يوسف واسلام ابراهيم هايل.. الناس كلها شاطره أوي عامله شغل حلو أوي الناس كلها مركزة أوي، شوفت صلة رحم عجبني أوي أوي اياد نصار ويسرا اللوزي واسماء أبو اليزيد، لا في حاجات السنادي لمحتها كده سريعًا لكن لما أخلص تصوير الاسبوع الجاي هتفرج على كل زمايلي واجيب الحلقات من الأول وأتابع كل الحلقات عشان أعرف اقول رأيي بجد في كل الناس.
وما رأيك في المنافسة الرمضانية في هذا العام ؟
مبروك لكل الناس وربنا يكتب النجاح والتوفيق للجميع وكل زمايلي بحبهم وكل زمايلي شطار وكل الأعمال الموجودة السنادي حلوة أوي أوي أوي وبحيي جدا جدا كل الشركات المنتجة والقائمين على الاعمال؛ لأنه موسم رمضاني بدراما مصرية خالصه القلب والروح والموضوعات تشرف أعمال حلوة وتشرف.. أنا شوفت كل بروموهات الأعمال شكلنا يفرح وفي ثراء احنا يعني دراما أصلية أصيلة، فـ انا فرحانة جدًا مبروك لكل زمايلي يعني مش عايزه أقول اسماء بعينها لكن بجد كل زمايلي شكلهم حلو وعاملين شغل حلو شايفة تعليقات الناس حاسة ان كل مجموعة من الجمهور بتتكلم عن عمل يعني في ناس كتير جدا حابة الحشاشين وبيتكلموا عنه كويس، في ناس بتتكلم عن امبراطورية ميم، في ناس بتتكلم عن المعلم، في ناس بتتكلم عن بيت الرفاعي، في ناس بتتكلم عن حق عرب ونعمة الافوكاتو، فـ الجمهور متابع كل الحاجات كلنا متشافين كمان سر الهي وصيد العقارب صدفة يعني المنافسة حلوة وشيك بننافس بالأجود والأحلى وكلهم جيدين وربنا يفرح قلب الجميع وكل رمضان علينا واحنا كلنا شغالين وكل الجمهور بتاعنا داعم ومساند لينا وواقف جنبنا وفرحان بينا دي حاجة بتفرحني يعني السنة دي المائدة الدرامية الرمضانية مليانة حاجات حلوة
ومنافسة شيك ومش شايفة السنادي لجان مش شايفة حركات صغيرة لا الناس السنادي مركزة في شغلها وكله كبير وكله جامد وحلو وان شاء الله الناس اللي هتنزل في النص التاني من رمضان موفقين.
المخرج هو المحرك الأساسي لأي عمل.. فـ كيف كانت تجربتك مع المخرج أحمد نادر جلال ؟
مرمطنا انا بشتكي لكل الناس احنا اتمرمطنا يا جماعة لف بينا الكوكب مش لف بينا مصر ده كان ناقص ياخدنا يعمل لوكيشن في المريخ كل اللوكيشن بتاعة أحمد نادر جلال حقيقية وطبيعية بندخل بجد في الترب وترب صقارة وننزل شوارع شبرا وكان مدخلنا في مود حلبة مصارعة يعني معندكيش فرصة تهزري ولا تكسلي ولا تقولي أريح في المشهد ده وأرجع تاني أركز
وكان بيتعامل معانا ان انتوا في بينكم منافسة كل واحد فيكم بينافس الجميع وبعدين بعد المنافسة الفردية في منافسة جماعية، انتوا كلكم فريق مع بعض بتنافسوا زمايلكم اللي هتنزل بأعمال تانية فـ أنا كنت حاسة اني بحارب على الجبهة، بجد هو شغله سريع جدا لكن المود واسلوب الشغل جديد عليا مفيش نفس مبتريحيش مذاكرة واجتهاد وتركيز طول الوقت
كل الناس عاملة زي خلية النحل.
ما هى الرسالة التي يناقشها مسلسل بيت الرفاعي من وجهة نظرك ؟
انا دايما أقول العمل ميهمنيش يكون فيه رسالة؛ لأن الفن انترتينمنت، الفن متعة.. بتعيشي حدوتة حالة بتستمتعي بيها وبتتفرجي، فـ أنا لو عايزة أطلع رسايل هقول ان انتي لو ليكي حق متيأسيش افضلي حاربي واجري لحد ما تجيبي حقك متوقفيش ومتستسلميش للظلم مساندة المظلوم دي حاجة مهمة خاصة في شخصية جمالات انك لما تلاقي حد مظلوم تقفي جنبه لآخر نفس لأن مناصرة المظلوم ده واجب ومن الشيم الأصيلة..لكن أنا مُصرة ان الفن مش لازم يطلع منه رسالة ومش لازم نفلسفه ونفنطه احنا بنستمتع عمل جميل وممتع فنانين بنحبهم
بنتفرج على حدوتة وبنتفاعل معاها ونتوحد معاها وبنجري ورا المشوار اللي الشخصيات بيجروه
لحد ما نوصل معاهم لنهاية الحلقات عشان نطلع نقول العمل حلو ومعمول صح، أنا دي وجهة نظري وبشتغل الفن من هنا، أنا لما بعمل كوميدي مش لازم يبقى جواه رسالة الفكرة من الكوميدي اني أبسطك دي لوحدها رسالة انك تتبسطي وتبتسمي، لما بعمل فنتازي أو حاجة في الفضاء مفيهاش رسالة لكن تجربة جديدة.
دورك في صدفة مختلف تماما عن جمالات.. هل تتخوفين من تقديم أدوار كوميدية ؟
لا لا مش بخاف خالص أنا خلاص أحمد فهمي جرئني وشجعني من وقت ما اختارني في مستر اكس اني أكون أحد أعضاء العصابة واني أكون من الكرو بتاعه اللي بيلعبه كوميدي أنا يعني خلاص بقيت بحب ده.
عندما تنظر رحاب الجمل لمشوارها الفني الملئ بالأعمال الفنية المميزة والمختلفة ماذا تصفه؟
اسميه كفاح ونجاح يعني ده الاسم اللي بحبه اوي لمشواري مشوار كفاح ونجاح.
هل توجد رسالة معينة تريدين توجيهها للجمهور من خلال الحوار ؟
أقولهم كل سنة وانتم طيبين اجري ورا حلمك ومتياسش لو انت مصدقتش نفسك متطلبش من حد تاني يصدقك، ابدأ بنفسك صدق حلمك واجري وراه واعرف انك في الطريق لوحدك مفيش حد هيساندك غير ربنا سبحانه وتعالى لأن كل واحد بيجري على حلمه هو، متستناش حد يحققلك حلمك لأن كل الأشخاص اللي حواليك بتجري عشان تحقق حلمها مش مطلوب منهم يحققولك حلمك.. كل واحد مستني ان حد يمدله ايديه أقوله لا قوم لوحدك قوم محدش فاضيلك قوم واجري ولما تحس انك تعبت ونفسك اتقطع والدنيا من حواليك بدأت تضعفك افتكر حلمك وخد نفس عميق وقوم تاني واجري ورا حلمك وهيتحقق ان شاء الله.
