حوار: تسنيم أيمن
تعيش”زينب العبد” حالة من النجاح المستمر ؛ حيث ظهرت في الكثير من الأعمال الدرامية واستطاعت أن تبهر الجماهير وتقنعهم بأدائها الرائع.
و كشفت”زينب العبد” لمجلة”هافن”، عن أسرار نجاحها وعن الكواليس التي تعيشها في عملها إليكم أبرز التصريحات:
ما أكثر المشاهد التي أعجبت “زينب العبد” في مسلسل”عمر أفندي “؟
انا حبيت دور أم هبه جداً حسيته مختلف طبعاً عن أي حاجة أنا عملتها قبل كده هي ست لذيذة مرحة وبتتحمل المسؤولية بالمناسبة بتحب صبري من قلبها وكل المشاهد أنا حبيتها وفي مشهد هو اللي هيبين شخصية أم هبه بجد هو مش كوميدي والمفروض إنه لسه هيتعرض هيبين جوانبها الإنسانية كمان يعني هي ست مسؤولة”.
كيف كان الاستعداد لشخصية”أم هبة”؟
والله أنا الورق جالي، أنا اللي رشحني في الدور ده أصلا ً مؤلف المسلسل مصطفى حمدي وده مش أول تعامل بيني وبينه دخلت معاه مسلسل وضع أمنى قبل كده وقعدنا واتكلمنا في الدور جداً وفهمني الموهبة شكلها إيه وعامله إيه وتفاصيلها إزاي قريت الورق الحقيقة بس إن فكرة التصوير أنا مصورة تقريباً دوري كله في يوم واحد يعني الدور كل اللي انت شفتيه ده اتصور في يوم واحد كان ديكوري يوم واحد فرحت خلصت المسلسل كله في يوم هو طبعاً اجهاد عليا بس حاولت على قد ما اقدر إن أنا اطلَّع كل المشاعر
اللي المفروض تطلع وأن انا أطلَّع الشخصية بالشكل ده والحمد لله من ستر ربنا عليا إنك لما تتضغطي في يوم واحد في ديكورك كامل ودا بيمر على الممثلين عموماً عادي بس هو كان ضغطه قوية عليا يوم كامل أو أزيد من يوم ونص كمان فده كان بالنسبه لي مرهق بس على قد ما قدرت الحمد لله عرفت أطلَّع الشخصية”.
كيف كان التعامل مع النجم”أحمد حاتم”؟
هو إنسان ظريف قوي راقي جداً في التعامل وتحسيه شبهنا كده شغال بشغف أحمد حاتم في حته كويسة جداً نجم ورغم كده عمري ما حسيته إنه بيتعامل مع الشغلانة بنجومية ما أعرفش ليه حسيت الاحساس ده وانبسطت جداً حتى في ناس كبار في السن نجوم عمري ما حسيت إنهم بيشتغلوا كده بيشتغلوا بروح وحسيت إن حاتم شغوف جداً تجاه شغله بالطريقة دي وده شيء ظريف جداً إن الممثل يفضل شغوف وشغال بإحساس إنه لسه هو ما بيتعامل مع نفسه على إنه نجم هو بيتعامل مع مهنة يحبها ويقدرها ده أنا شفته في حاتم ودي حاجة كويسة جداً”.
أي زمن تريد أن تكون”زينب العبد”فيه لو كان السرداب حقيقياً؟
بحب أي حاجة قديمة، ممثلين قدام، أفلام قديمة، مسلسلات قديمة أنا بحب الزمن القديم ولو كان في سرداب كنت رجعتله”.
كيف استطاعت “زينب” أن تتقمص دور: “قطة، وعنايات”؟
هي طبعاً شخصيهً عنايات مختلفة جداً عن قطة، عنايات دي رد سجون ملهاش أصل، قطة رغم شرها و اللي مربيها خالتها يعني هي متربية في بيت عيلة أياً كان العيلة دي بقى شكلها إيه، عنايات شرسة جداً الاختلاف إن قطة هنا اللي مخليها بالشر ده إنها اتربت مع خالتها في الولاء كله ليها فطبيعي إنها لو قالت لها ارمي نفسك في البحر هترمي نفسها في البحر دي خالتها اللي ربتها واللي مأكلاها واللي مشرباها، عنايات بقى كانت صعبة جداً ورد سجون وحتى لما كانت بتتكلم على أمها أمها لما ضايقتها خزقت لها عينيها فتخيلوا كراكتر بالطريقة دي فعنايلت أكثر شراً.
في شر انت ما بتفكرش بيعمل إزاي ودي كانت شخصية عنايات أما قطة كانت بتفكر لكن عنايات متهورة ومعندهاش دماغ اصلاً تفكر واللي بيجي على دماغها بتعمله إذن فعنايات هي الأكثر شراً “.
هل “زينب العبد” ستستمر في مسلسل”العتاولة 2″ أم لا؟
الحقيقة هما كلموني ورحت المفروض إن أنا اتفقت بس أنا لحد دلوقتي لم أمضي ولم أوقع على العقد لحد دلوقتي فأنا على كف رحمن هم كلموني بس أنا رحت واتفقت بس لسه لم أمضي
ما هو أفضل مسلسل شعرت بأنه بداية انطلاقك؟
من أقوى الأدوار اللي حبيتها أم ياسر في مسلسل أبو عمر المصري لإنها ست تركيبة نفسية معينة بتربي طفل مش طفلها وعمر المصري كل ما ياخد ابنها منها بتبقى متأثرة جداً، فحقيقة كل دور عندي بيعمل ستيب معينه يعني حتى دور ملوك الجدعنة كنت فيه ضيفة شرف بس طلعت ترند جامد”.
كيف تتعامل”زينب العبد” مع ضغط العمل؟
بتعامل مع ضغط الشغل بالدعا بقعد اقول يا رب يا رب وفقني والله بالدعا يا رب إديني القوة طبيعي إن الناس كلها بتبقى مجهدة سواء دكتور، مهندس أي ضغط في أي شغلانة لما بتبقي مضغوطة ومحتاجة تطلعي نتيجة ما بتعمليش حاجة غير إنك بتقولي يا رب “.
ما البيئة التي تناسب “زينب العبد” للعمل؟
بحب البيئة السوية ، والحقيقة اللي أنا نفسي فيه إني ابقى أكثر هدوءاً داخلياً لإني من الناس اللي بتاخد الحاجة على أعصابها، لما باجي بشتغل بشتغل باعصابي زيادة عن اللزوم رغم الهدوء الخارجي ودي كارثة ولازم اتغلب عليها بس مش عارفة لإني من النوع الناس اللي بتحب تاخد الحاجة على أعصابها عشان دايماً ببقى عايزه اشتغل وأعمل حاجة كويسة ودائماً ببقى شايلة هم اللي حواليا وعايزاهم يطلعوا ناجحين ويطلَّعوا أحسن ما عندهم عشان كلنا ننجح ما هو انت النجاح ما بيبقاش فردي النجاح بيبقى بالنسبة لك جماعي فلما بدخل عمل أو حاجة ببقى شايلاه فوق دماغي ودي كارثه لازم أركز في شغلي ولكن أنا مش بعرف كده “.
هل هناك عمل قريب سوف يبهرنا لـ “زينب العبد” في هذا الموسم؟
” الحقيقة في عمل قريب ليا في الموسم ده ووقعت عليه من شهرين بس مش هكشف عنه إلا عند التصوير”.
