حوار/ منار عبد الناصر
– مكنتش متوقعة الناس تركز مع عبير في حالة خاصة
– حبيت مشاهدي مع حسن أبو الروس لأنها كانت لايت
– نفسي أمثل مع منى ذكي وكريم عبد العزيز
تألقت الفنانة الشابة وئام مجدي فى دور “عبير” بمسلسل حالة خاصة الذي تم عرضه على منصة Watch it، وقد حقق العمل نجاحًا كبيرًا، وتفاعلًا من قِبل قاعدة كبيرة من الجماهير طوال فترة عرضه ليتصدر التريند عبر مختلف مواقع التواصل الاجتماعي، وتواصلت مجلة هاڤن مع الفنانة وئام مجدي التي جسدت دور المحامية عبير والذي أحبها الجمهور لتتحدث عن كواليس العمل وتكشف عن أسرار في حياتها في حوار مميز، وإليكم نص الحوار…
بدايةً حدثينا عن تجربتك في مسلسل حالة خاصة؟
كانت تجربة حلوة أوي وكنت مبسوطة، كنت متوقعة أن المسلسل هيبقى حلو بس مكنتش متوقعة النجاح وخصوصا نجاح دور عبير.
كيف كانت الاستعدادات لشخصية “المحامية عبير”؟
حاولت أعمل سيرش واتدرب على لو عندي مرافعة أعمل ايه بس ملقيتش ده، فـ حاولت أن الشخصية تبقى جادة شوية ووقورة.
وماذا عن الكواليس مع الفنانة غادة عادل؟
الكواليس مع غادة جميلة وهى فريندلي جدا وطيبة وبتساعد وبتسمع والكواليس كانت حلوة أوي معاهم كلهم.
هل يوجد تشابه بين “عبير” ووئام مجدي؟
متهيألي الشبه بين وئام وعبير إنها مش عايزة اللي حواليها يكونوا في مشاكل هى اتحطت فيها، وفكرة إنها حاولت تدور على الأمان حتى لو هى مش هتكون مبسوطة، بس فكرة الأمان عندها أهم من أي حاجة تانية.
ماذا عن انطباعك عن الفنان حسن أبو الروس قبل التصوير وبعده؟
أنا كنت عارفة حسن من ناس صحابنا، فـ كنت عارفة إن هو شخص بيهزر أوي وفريندلي جدا، وعز فيه نفس الحاجات اللي في حسن اللي هو الهزار والضحك وأنه يرخم، فـ كنت بحب مشاهدي أنا وحسن عشان فيها حاجة لايت وحلوة.
موقف طريف حدث لك أثناء التصوير؟
مش فاكرة موقف بالظبط بس هو اللوكيشن كله كان لذيذ أوي.
وكيف استقبلتي ردود الأفعال من الجمهور؟
مكنتش متوقعة خالص أن الناس تبقى مركزة مع شخصية عبير أوي كده، فـ مبسوطة جدا جدا، وبشكر ربنا على كل كلمة حلوة بتتقال.
بما إنك لكِ تجارب مع الإخراج، وئام مجدي تجد نفسها في التمثيل أم الإخراج؟
أنا ممكن يبقى نفسي أجرب تجربة إني أخرج بس بيتهيألي في التمثيل هبقى أحسن ولو ركزت في ده هبقى أحسن.
هل توجد أي مشاركة لكِ في أعمال ماراثون رمضان القادم؟
لغاية دلوقتي مفيش أي بروچيكت، جالي كذا مسلسل بس مفيش أي حاجة ظبطت أو مضيتها، فـ مش عارفة هكون موجودة في رمضان ولا لأ.
لو وئام مجدي مش ممثلة ولا مخرجة ممكن تبقى إيه؟
مش عارفة؛ لأن أنا زمان كنت تجارة فـ مشتغلتش فيها أو الحاجات اللي حاولت اشتغل فيها مكملتش.
دايما مشهورة على السوشيال ميديا بڤيديوهاتك الطريفة مع جدتك.. رأيها كان إيه عن دورك في مسلسل حالة خاصة؟
تيتا مشافتش غير أربع حلقات وقفشت أول ما حسن قعد يهزر في السن والجواز قالت خلاص مش هكمل المسلسل، فـ مشافتش لحد الاخر يعني.
في مقولة بتقول “لازم ننجح عشان في عيون لازم نفرحها وعيون نكسرها”.. وئام مجدي في حياتها عيون عايزة تكسرها؟
أظن كلنا في حياتنا ناس عايزين نفرحها وناس عايزين نكسرها، فـ آه طبعا، بس أنا مش عارفة مين بس أكيد آه.
لو هتمثلي دور مهم مع بطلة صف أول تحبي تكون مين؟
لو بطلة هتكون منة شلبي أو منى ذكي، ولو بطل هيكون كريم عبد العزيز أو ماجد الكدواني.
رسالة لجمهورك من خلال الحوار؟
بشكرهم على كل كلمة حلوة اتقالت وعلى المسلسل ويارب كل اللي جاي يبقى حلو زي حالة خاصة.
