✍️ يوحنا عزمي
الجيش المصري حالياً بيحشد عشرات الآلاف من الجنود في سيناء.
والسبب؟! .. نتنياهو رفض الهدنة المقترحة وبدأ تنفيذ خطة “عربات جدعون 2” لاقتحام غزة واحتلالها وتهجير سكانها، ومسح أحياء كاملة من على الخريطة.
وردًا على ده ، فالمقاومة النهارده نفذت عملية مركبة أسطورية وصفها جيش الاحتلال بأنها الأسوأ ضدهم من سنتين.
خلال ال 24 ساعة اللي فاتوا ، حصلت أحداث كتير خطيرة جداً جايز تكون مسمعتش عنها ، ف خلينا كده نمر عليهم سريعًا عشان تبقى فاهم الوضع الكامل على الأرض عامل ازاي.
أول حاجة ؛ امبارح نتنياهو أعلن رسمياً انه “لا تغيير في موقف اسرائيل” .. بمعنى انه رفض عرض الهدنة اللي اقترحته مصر ، ووافقت عليه حماس بدون شروط. وده معناه انه خلاص بيختار الإستمرار في الحرب مهما كان الثمن.
ودلوقتي ، وحسب تقارير لشبكات عالمية، جيش الاحتلال بدأ بالفعل عملية استدعاء وتعبئة 60 ألف جندي احتياط عشان يشاركوا في العملية العسكرية اللي دايرة دلوقتي في غزة تحت إسم “مركبات جدعون 2”.
العملية دي حسب شهادات الفلسطينيين نفسهم، هي مش مجرد عملية عادية .. دي أضخم هجمة اسرائيلية من بداية الحرب .. جيش الاحتلال بالفعل مسح أحياء كاملة من على الخريطة زي الشجاعية وبيت لاهيا وبيت حانون، وحاليًا شغال على تدمير حي الزيتون اللي هو أكبر أحياء غزة ، وبعده جباليا والصبرة.
اللي هما بيعملوه بالضبط هو أشبه بكماشة بيتم إطباقها على السكان من كل النواحي والاتجاهات، وفي وسط كل ده، سايبين الطريق الساحلي مفتوح عشان السكان يهربوا جنوبًا ناحية منطقة المواصي ، تمهيدًا لحشدهم ناحية الحدود المصرية
طب ومصر ساكتة؟
لأ .. مصر دلوقتي دخلت مرحلة حشد عسكري رهيبة ومحصلتش من أيام حرب أكتوبر.
حسب تقارير صحفية من موقع “ميدل إيست آي”، فالجيش المصري في الأيام اللي فاتت قام بعملية تعبئة لأكتر من 40 ألف جندي مصري في شمال سيناء، وتحديدًا في المنطقة C بمحاذاة قطاع غزة … ولو انت مش فاهم قدر الرقم ده ، فخليني أقولك أنه اكتر من ضعف العدد المسموح بيه في معاهدة كامب ديفيد.
ومش بس كده … وزير الدفاع المصري الفريق أول عبد المجيد صقر امبارح طلع تصريحات خطيرة جدًا، قال فيها إن حماية الأمن القومي مهمة “مقدسة”، وان اللي جاي يتطلب منا إستعداد قتالي دائم وقوة قادرة على الردع.
وبالمناسبة في قصة خطيرة جدًا بتحصل في الكواليس دلوقتي ومحدش في الإعلام تقريباً بيتكلم عنها ، هي إن أمريكا وترامب بيساوموا مصر على صفقة التهجير مقابل حل مشكلة النيل وسد النهضة .. بس دي هحكيلك عليها في بوست منفصل
طب أومال المقاومة فين؟ .. هل هي ساكتة وبتتفرج على اسرائيل وهي بتنفذ خطة احتلال غزة وتفريغ السكان؟
لأ خالص … المفاجأة بقى ان فصائل المقاومة النهارده الصبح نفذت واحدة من أضخم العمليات ضد جيش الاحتلال ، واللي وصفها المحللين بأنها أعنف ضربة ليهم من سنتين.
طب أيه اللي حصل؟
العملية بدأت لما قوة مجاهدة قسامية قوامها فصيل كامل من المشاة ، خرجت فجأة من فتحة نفق جنوب خان يونس ، وبدأت تشتبك مع دبابات الميركافا اللي كانت بتحرس المكان ، وضربوها بقذائف ياسين وعبوات ناسفة، لحد ما نجحوا في تعطيلها بالكامل خلال ثواني.
وبعدها مباشرة بدأوا يضربوا نار وقذائف على مجموعة مجاورة من البيوت كان متحصن جواها جنود من الاحتلال ، وغربلوها بالرشاشات والمدافع لحد ما أربكوا العدو وثبتوه مكانه.
وبعدين بدأت المرحلة التانية من الخطة
المقاتلين اقتحموا المبنى ، وبدأوا يشتبكوا مع الجنود من المسافة صفر بالقنابل والأسلحة الخفيفة ، لحد ما وقعوا منهم العشرات ما بين قتيل ومصاب .. وحاولوا كمان يخطفوا منهم كام واحد بس مالحقوش.
ليه .. عشان الاحتلال بعت دبابات تانية وطيارات عشان تقدم دعم وتحاول تجلي الجنود .. بس بعدها مباشرة ، قناص من المقاومة اصطاد واحد من قادة الدبابات وقضى عليه ، ومقاتل تاني فجر نفسه في قوة الدعم اللي كانت رايحة تنضم للمعركة ، وقضى عليهم بالكامل تقريبًا.
العملية دي استمرت لمدة ساعات ، وخلفت خسائر فادحة في الجنود والدبابات والآليات ، ووصفها الإعلام العبري بإنها واحدة من أسوأ الضربات اللي شافها الجيش من سنتين.
وعلى الناحية التانية من العالم بقى ؛ ترامب دلوقتي بيحاول ينهي الحرب ما بين روسيا وأوكرانيا بالكامل، ولسه امبارح مقابل قادة أوروبا كلهم عشان يفرض عليهم الشروط ويخلص من المعركة دي في أسرع وقت ، لإنه متوقع ان في انفجار هيحصل في الشرق الأوسط خلال الأيام اللي جاية ، وعايز يبقى فاضيله تماماً.
الإيرانيين شكلهم بيحضروا للحرب جديًا خلال الأسابيع الجاية ، وخطط اسرائيل اللي بتنفذها دلوقتي احتمال كبير تفرض على مصر الدخول في مواجهة معاها قريب جدًا .. وده لو حصل ، فالتحليلات العسكرية بتتوقع انه هيكون كارثة هتزعزع إستقرار الشرق الأوسط كله.
